Nuummi inuit coronavirusip ernumatiginera pillugu: - Imminut paarineruvugut
Asalluartarlutillu asakulagit, tallinnut silaannarmuunngitsoq tangajortarit, eqitaarinak, qitserarnak inunnulluunniit allanut qanippallaarnak.
Nunatta nakorsaaneqarfiata tamakku innersuussutigai.
Nunatsinni coronavirusimik tunillatsissimasunik suli nalunaarsuisoqanngilaq. Taamaakkaluartorli inut ernumapput, tamaammat KNR-ip inuit sisamat Nuup qeqqani naapitani tunillatsinnaveersaarniarlutik qanoq iliuuseqarniarnersoq apeqquteqarfigai.
Kalaaliaqqami innersuussutip malillugit nalinginnaasumik eqqiluisaarnerusoqarpoq.
- Soorunami mianersussaagut, maanga pisiniarpassuit ullormut isertarmata aamma sajaalluartorujussuuvugut, Hanseeraq Lynge oqarpoq, nangillunilu:
- Suna tamarmi matserfiit assigisaalu tunillaannartuiarneqarput. Suna tamarmi inuit assaminnik attorsinnaasagaat.
- Soorunami ernumanaqaaq. Aammami aatssaat siullerpaami nunarsuarmioqatit tamarmik virusimut ernumanerat nalaapparput, Karen Fleischer oqarpoq, nangillunilu:
- Naalakkersuisut oqartussallu oqaatigisaannut fjernsynikkut malinnaavugut. Taamaalilluta innersuussutaasut takkuttut malippagut, ernumavallaarnaveersaarpugut.
- Spritimik qaqorsaammillu pisivugut. Ernuttagullu errortorluartassasut qinnuigalugit.
- Soorunami ernumanaqaaq. Pingartumik utoqqalilluni. Inuiaqatigiinnilu sanngiinnerusut aamma eqqarsaatigivakka, Agathe Sørensen oqarpoq.
- Paarilluartorujussuuvunga. Assut. Uagutsinniit anerusuppallaanngivippunga, Sigrid H. Dalager oqarpoq.
- Assakka nalinginnaasumit errortorluarnerusarpakka, inunnillu naapitsigaangama ulussakkut kunissinaveersaarlunga.
