Von der Leyenip nunarput Mette Frederiksen peqatigalugu tikeraassagaa

EU-kommissionip siulittaasua, Ursula von der Leyen, Danmarkimi ministeriuneq Mette Frederiksen peqatigalugu Kalaallit Nunaannukassaaq.

Politikerit nuimasut taakkua marluk Kalaallit Nunaannut septembarip arfernani arfineq-aappaanilu tikeraassapput.

Tusagassiivik Euractiv taama allaserinnippoq.

Naalakkersuisut siulittaasuat Jens-Frederik Nielsen tikeraarnerminni ataatsimeeqatigissavaat.

Ataatsimiinnissaat qangali pilersaarutaagaluarpoq, pisulli assigiinngitsut pissutigalugit kinguartinneqarnikulluni.

Ursula von der Leyenip Kalaallit Nunaannut marsimi tikeraarnissaa aallaqqaammut pilersaarutigineqaraluarpoq.

Mette Frederiksenili Folketingimut qinersisoqarnissaanik taava nalunaaruteqarpoq, angalanissarlu kinguartinneqarluni.

Aammattaaq naalakkersuisoqatigiinnissamik isumaqatiginninniarnerit qaammatini arlalinni utaqqisitsipput, Euractiv allappoq.

EU-mi kommissioni Ursula von der Leyen Kalaallit Nunaanni illoqarfiit pingaarnersaanni Nuummut tikeraarpat, politikkikkut siunnersuutinik tigussaasunik saqqummiussissaaq.

Kommissionip EU-p Kalaallit Nunaannut tapiissutigisartagaasa marloriaammik amerlanerulernissaat siorna siunnersuutigaa, taamaalillutik tapiissutit 2028-miit ukiut arfineq-marluk ingerlaneranni 530 million euronut, tassa 4 milliard koruuningajannut, amerleriassapput.

Kommissionip aningaasaliissutit 150 millionit eurot sinnerlugit amerlassusillit, tassa 1 milliardit sinnilaarlugit, tamatuma saniatigut saqqummiukkai, Euractiv allappoq.

Tv2-p nutaarsiassiinera naapertorlugu, Ursula von der Leyen EU-p nunattalu akornanni isumannaallisaanermut suleqatigiinnissamullu nalunaarut atsiussavaa, tamanna pillugu EU-Kommission sinnerlugu oqaaseqartartoq Reutersimut paasissutissiivoq. 

RITZAU