Vollsmosemi ajortumeeriniat pingasut sakkortuumik pineqaatissinneqarput

Odensep avatinnguani Vollsmosemeersut ajortumeeriniatut pasineqarlutik eqqartuussassanngortinneqartut pingasut sakkortuumik pineqaatissinneqarput.
Allattoq Jaaku Lyberth
novembarip 23-at 2007 17:07

Muhammed Fahir, ajortumeeriniat ittuattut isigineqartoq, Ahmed Taldai-lu, 22-nik ukiulik, tamarmik ukiut aqqanillit paarnaarussassanngortineqarpoq, Ahmed Taldai-lu paarnaarussaareeruni Irakimut nunasitinneqartussanngorpoq, Danmarkimullu qaqugumulluunniit uteqqusaajunnaassalluni. Eqqartuunneqartoq kingulleq, Abdellah Andersen, ukiuni sisamani paarnaarussassanngortinneqarpoq. Eqqartuussisup oqaatigaa nammineq inuinaallu eqqartuusseqataasussatut qinikkat isumaqatigiillutk pineqaatissiillutik.

Muhammed Fahir, ajortumeerinianut siuttuusimammat sakkortuumik pillarpaat, Ahmed Taldai-lu sakkortoqataanik pillarpaat, ajortumeeriniarnermi atugassat iluaqutissallu, soorlu qaartartuliornissanut atortussat, katersortarsimammagit. Ahmed Andersen, sakkukinnerusumik pillarneqarpoq, piareersarnerup nalaani peqqissimilluni ilaajunnaarniaraluarsimamat, pillarneqarporli ilani nangaasaarsimanngimmagit.

Ajortumeeriniat paasineqarput angutip qallunaap Odensemi ajortumeeriniarlutik oqaluttut tusaagamigit politiit isertortumik paasiniaasartuinut oqaatiginnimmat. Tamatumalu kingorna isertortumik paasiniaasartut angut kilitsissiatut qaammatit arlallit atorsimavaat.