VM-qataarngaarneq neriuutigisamit ajorneruvoq

Sisoraaserluni ooqattaasartartup Aqqaluartaa Olsenip inuusuttut VM-qarneranni takutitani naammaginngilaa.
Allattoq Noah Mølgaard
februaarip 02-at 2011 07:36

Aqqaluartaa Olsen Sisimiuneersoq sisoraaserluni ooqataasarnermi inuusuttut VM-qarneranni peqataarngaarami normu 74-nngorpoq peqataasunit 95-iusunit.

Inuusuttut VM-qarnerat Tjekkiemi illoqarfimmi Nove Mestomi aallarnerneqarmat 10 kilometerimut unammineqarpoq tassanilu Aqqaluartaa Olsen ooqattaasarnerni tamatigut marloriarluni uniortarpoq. Piffissaq katinneqarmat ajugaasumit Tysklandimeersumit Tom Barthimit 4.23 minutsinik kigaanneruvoq. Tamannalu kalaallip taassuma neriuutaannit ajorneruvoq.

- Ooqattaasarnissanut sisoraatinillu ingerlanissannut unammineq sioqqullugu neriuutikka angusannit anginerusimagaluarput. Taamaattumik angusara naammagivallaanngilara, taama Aqqaluartaa Olsen oqarpoq.

Illoqarfimmi unammiffimminni Nove Mestomi sapaatip-akunnerisa pingasut matuma siorna Aqqaluartaa Olsen aatsaat taama angusarissaartigaluni ingerlagaluarpoq tassanilu angusani inersimasut VM-qarnissaannut anngussutigai.

Inersimasut VM-qarnissaat Ruslandimi illoqarfimmi Khanty Mansiyskimi ingerlanneqassaaq februarip naalernerani tassanilu nunarput sinnerlugu unammiartoqatigissavai Kristian Kristoffersen aamma Øystein Slettemark.