VM-imut atatillugu unammisunut nunarput aaqqissuisoorusuppoq
Assammik arsarnermi pisussarpassuaqarpoq angallanneq aningaasaqarniarnerlu iluatsilluassappata. Maannali qularnarunnaarpoq qallunaat inuusuttut nunanut allanut unammisartut junimi nunatsinnukarnissaat kalaallit angutit nunanut allanut unammisartut unammissallugit.
Assammik arsarnermi VM aqagu Spaniami aallartissaaq Mikkel Hansen tusaamasallu allat nunarsuarmi pitsaaneqqusaatissammata. Qallunaat assammik arsartartuisa kattuffiata DHFip nangitsisussat maanna piukkunnarsalereerpai. Taakku inuusuttut nunarsuarmi pissartanngorniunnerani Bosnien Herzegovinami peqataassapput. Maanna aamma aalajangiuppaat nunatsinni piareersaatigalugu sungiusaqatigiinniarlutik, tassanilu kalaallit nunanut allanut unammisartut sungiusaatigalugu unammissavaat.
Nuummi unamminissat juunip 15-at 16-allu pisussanngortut nunanut allanut unammisartut ataqatigiissaarisuat Kurt Lauritsen nalunaarpoq.
Danmarkip inuusuttuni nunanut allanut unammisartuinut unammineq kalaallit aamma iluaqutigissavaat tassami panamerikamiut pissartanngorniunnissaannut oktoberimi anngunniuttussaagamik. Anngunniunnissani aaqqissuisuunissamik Assammik arsartartut kattuffiat GHF sulissuteqaleruttorpoq.
- PATHF aamma IHF Nuummi aaqqissuussisuunissatsinnut tapersersuipput maannalu angalanissamut tunngasut iluarsiniarneqarput unammersuarnerup taama annertutigisoq iluatsissinnaaniassammat, Kurt Lauritsen nalunaarpoq.
Panamerikamiut unammersuarnissaannut anngunniunnermi peqataasussat tassaapput: Canada, USA, Mexico, Den Dominikanske Republik, Puerto Rico aamma Cuba. Iligiit inissilluarnerit sisamat 2014-mi panamerikamiut pissartanngorniunnissaannut anngutissapput.
