Arsarnermik VM-imi unammisoqaleraangat isiginnaarrnissamik periarfissaarutsitsisarnissaq, arnat kalaallit politikerit kajumissaarutigaat. Taamatut kajumissaarineq pissuteqarpoq VM-ip nalaani anngiortumik arnanik atortittartunik pinngitsaaliinikkut Tyskland-mut eqqussuisoqarnera.
Nunani Avannarlerni Killerni arnat Inatsisartunut ilaasortat Qaqortumi isumasioqatigeeqqammerput, tassanilu peqataasimasoq Ane Hansen Inuit Ataqatigiinneersoq isumaqarpoq atortittartunik eqqussuineq akerlilerniaraanni VM-ip nalaani isiginnaarummik qamitsisoqartassasoq.
- Tassa akuersaarneqarsinnanngimmat meeqqanik inuusuttuarannguanik arnanillu atortittartunik niueruteqarnermik isikkamik arsaannermut atatillugu aaqqissuussisoqatarnera, tamannalu unitseqqullugu taamatut kajumissaarivugut. Iliuuseqartoqanngippat kajumissaarutigaarput, isikkamik arsaannermi unamminerni isiginnaariartoqassanngitsoq, aamma tv-kkut. Taama oqarpoq Ane Hansen, Inuit Ataqatigiinneersoq.
Tysklandimi VM-ertoqarnissaani atortittartut qanoq amerlatigisut tikiussuunneqarsimanersut iluamik ilisimaneqanngilaq, Tysklandimilu arnat peqatigiit isumaqarput atortittartut Tyskland-imut angiortumik eqqussuunneqarsimassasut 100.000-it missaanniittut.