VM-imi Danmarkip arsartussai ullumi toqqarneqassapput

Ullut 31-iinnaat qaangiuppata, juunip aqqarnanni, nunarsuaq tamakkerlugu arsaannermik unammersuarnissaq, naalagaaffimmi Afrikap Kujaterpiaaniittumi Sydafrikami aallartinneqassaaq.
Allattoq Elisa Isaksen
maajip 10-at 2010 09:08

Nunatsinni nalunaaqutarput najoqqutaralugu ullup qeqqanut Danmarkip nunanut allanut unammisartuinut sungiusaasup Morten Olsenip Danmarkip unammisussai kikkuussanersut saqqummiutissavai.

Piffissaq kingullerpaaq atorlugu arsaattartut kikkut ilaassanersut pissanngatigineqarpoq.

Qularutissaanngitsumik peqataasussat ilaat nalunngereerpavut, soorlu Jon Dahl Tomasson, Niklas Bendtner, Daniel Agger, Christian Poulsen aamma Simon Kjær, tupaallaatigineqartussanilli ilaqartussaapput, unammersuariaqataasussammi 30-ussapput.

Nunarsuaq tamakkerlugu arsaannermik unammersuarneq juunip aqqarnannit juulip aqqarnannut ingerlanneqartussaavoq, soorunami KNR-TV-kkut aamma aallakaatinneqartassalluni.

Danmarkip arsaannermi unammiartortitassai nittartakkatsinni knr.gl-imi ullup ilaa takuneqarsinnaassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq