Assammik arsarluni VM-eqarnissaanut ullut 18-iinnanngortullu kalaallit arsaqataasussat allanngortinneqartariaqarput.
Tassami talerpia tungaani inissisimasartoq GSS-imeersoq Ulrik Berthelsen pissartanngorniunnermut peqataasinnaajunnaarluni nalunaarsimammat.
Tassunga paarlatsitut nuna tamakkerlugu sungiusaasup Jacob Andreassenip peqataasussatut toqqarpaa Kasper Thorleifsen, Nagdlúnguameersoq, taanna nunanut allanut unamminermi ataasiarluni peqataareersimavoq.
Tysklandimi VM-eqarnissaq januaarip 20-anni aallartissaaq, unamminernilu siullerni nunatta unammissavai Slovenien, Tunesien, aamma Kuwait.