Vladimir Putinimut isorinnittoq eqqartuunneqarpoq

Vladimir Putinimillu isorinnittoq ukiorpassuit suli paarnaaqqasussanngorluni.

Kiffaanngissuseq, Khodorkovskijimik illersuisut hunnorujut marlussunnik amerlassuseqartut eqqartuussiviup silataani nilliapput, milliarderiusimasoq ullaaq politiinik sakkulisartunik paarsisoqarluni eqqartuussiviliarmat.

Akerliussutsitimik takutitsillutik illersuisut nillianerat iluaqutaanngilaq. Eqqartuussivimmi Khodorkovskij uuliamik 200 millionit tonsit sinnerlugit annertussusilimmik peqquserluuteqarsimasutut, rublinik milliardilikkaanik pinerlunnikkut aningaasarsianik niuertarfissuaatigisimasani Yokus aqqutigalugu malunnarunnaarsaasimasutullu pisuusutut eqqartuunneqarpoq.

Ullut arlaqanngitsut qaangiuppata pillaat tamanut saqqummiunneqarnissaa ilimanarpoq, Khodorkovskij, Ruslandimi pisuujunerpaasimasoq, ukiuni arfinilinniit arfineq pingasunut suli paarnaarussaaqqanissaa eqqoriarneqarpoq

- Pitsaanngitsumik kalerriineruvoq, eqqartuussivittalu kiffaanngissuseqannginnerannik ersersitsilluni, politikkikkut ilungersuutigisaminik ingerlatsisoq Leonid Gusman eqqartuussut pillugu oqarpoq.

Eqqartuussineq amerlasuunit ajorineqaraluartoq, Ruslandip politikikkut aqunneqarnerani qullersanut naammattoorsilluarluni takkuppoq.

Khodorkovskijimi ukiorpassuarni Vladimir Putinimut sakkortuumik isorinnittuusimavoq, ilaatigullu Putin peqquserluttuunerarsimavaa akilersittartoq, naalakkersuisuilu piiaasunut sanilliullugit.

Mikhail Khodorkovskijili ukiuni arfineq pingasuni, akileraarutinik peqquserlussimasutut, paarnaarussaaqqanerminit 2011-imi iperagaasussanngoraluarpoq. Sivisunermilli paarnaarussaaqqasussanngorpoq. Paarnaarussivimmiinermini Putinimik Ruslandillu politikikkut aaqqissuussaaneranik isorinninnerminik saqqummiussisinnaanera ajornarnerussaaq.