Vladimir Putin tunuartariaqassaaq

Ruslandimi inatsisit malillugit russit præsidentiat, Vladimir Putin, ukiup aappaata affaa qaangiuppat præsidentiunerminit tunuartariaqassaaq.

Kia paarlassaneraa tunuarpallu qanoq pisoqassanersoq russit paaserusullugu TV-kkut aallakaatinneqartumik ullumi apeqqarissaarfigaat. Vladimir Putin erseqqilluinnartumik apeqqutinut akivoq:

- Tunuartutut isikkoqassaanga pissaanerli pigiinnassavara.

- Vladimir Putinip Ruslandmi inatsisit tunngaviusut soqutigisaminut tulluussarlugit allanngortinniarnagit arlaleriarluni erseqqissaavoq. Erseqqissaanerminilu imminik taasisimasut tatiginninnerat pigiinnassallugu neriuutiginerarpaa ataavartumik Ruslandip ineriartortinneqarnera uninnginniassammat. Taamatut oqarmat imatut paasivara; Ruslandimi naalakkersuinermik suliaqarnini attatiinnarusukkaa pissaanerlu arlaannaatigut iperarusunngikkaa, Jan Jakob Florian oqarpoq.

Taanna DR-imit aperineqarpoq tamat oqartussaaqataanerat atorlugu Ruslandimi ineriartorneq aaqqiivigineqartussaannginnersoq, ima akivoq:

- Ruslandimi tamanna atorneqarpianngilaq, præsidentit pissaanilerujussusarput. Qangarsuaaniilli kommunistit atuutinngikkallarmatali taamaappoq. Inuit ataasiakkaat tatigineqartarput, soorlu Vladimir Putin maanna siuttuugami tatigineqartoq. Tjetiniami ulluni makkunani sorsunneq maanilu naalakkersuinermik suliaqartut toqorarneqartaraluartut pissaaneqarnera nikinngilaq, Jan Jakob Florian akivoq nangillunilu:

- Innuttaasut atsiortitsillutik tunngaviusumik inatsisit allanngortinniarsarigaluarpaat, tamannali iluatsinngilaq. Putinip taartissaanik toqqaanissaq eqqarsaatigalugu Ruslandimi inatsisartut ilungersuuteqarput. Pissaanilissuillu tunngaviusumik inatsit allanngortinniarsaralugu aamma ilungersorput, Jan Jakob Florian naggasiivoq.

Nunarsuarmi gassinik piiaasut annerpaartaanni pissaaneqarnerpaartaannilu pisortatut Vladimir Putin atorfinereeruni Ruslandimi oqartussaaffimminik tigumminniinnarsinnaavoq.