Vladimir Putin pikkunaatsoortitsivoq
Ruslandip præsidentiata Putin-ip Ruslandimi pissutsinik ukiumoortumik nassuiaalluni oqalugiaata ilimagisamit pikkunaanneruvoq, tassami Vladimir Putinip oqalugiaammini nunanut allanut politikki pingaarnerutissimavaa.
Sorsunnersuarmi kingullermi nazistinut ajugaanerminnut eqqaaniutitut russit ullormik pingaartitsiffianni maajip ulluisa qulingiluaanni præsident Putin-ip oqalugiaataanik tusarnaartut pikkunaatsoorsimaqaat.
Ilimagineqaraluarpoq USA-p siuttuata tulliata Dick Chaney-p nikassaarpaluttumik russit aqutsisuinik isornartorsiuinera akissuteqarfigissagaa – taamaanngilarli. Putin-ip USAp illersornissamut aningaasartuutai russit aningaasartuutaaninngarnit 25-riaammik annertunerusut upuruaannarpai, sakkutuunilu neriorsorpai pitsaanerusunik sakkutaarnissaannik.
Putin-ip avataanit tatisimaneqanngitsumik ingerlaaseqarnissaminni tamanna pisariaqarluinnarnerarpaa. Toqqaannartumik oqaatiginngikkaluarlugu taavaa Iran-imut atomip nukinganik nukissiorfiliortiternermi atortunik pilersuinissaminnik pilersaaruteqarlutik. Iran-imik niuernikkut killilersuinissaq, sakkutuuliinissarlu aqqutissaannginnerarpai.
Russit tamat oqartussaaqataanerannik, upperisaminnillu namminneq toqqaasinnaannginnerinik kitaamiut uparuartuiarnerat Putinip pissusaannginnerarpaa; Naalaagaaffiillu Peqatigiit nunarsuarmioqatigiinnut annertunerusumik sunniuteqalernissaa kissaatigaa.
