Vladimir Putin mianersoqqusivoq

1962-imi Cubami saqitsaanneq pissutigalugu nunarsuatsinni atomip nukinga atorlugu sorsunnersuaq aallartinneqangajalluinnarpoq.

Maanna Russit præsidentiata Vladimir Putinip Amerikamiut Europami raketsinik igeriuttakkanik inissiiniarnerat, tassunga assersuuppaa.

- Iliuuseriniagaat uatsinnut taamanikkut pisunut assingupput. Tassami nunatta killeqarfiisa qanittuani assingusunik sakkutooqarfiliorniarput, Putin ippassaq taama oqarpoq, tassa Portugalimi tusagassiortunik katersortitsinermi Amerikamiut iliuuseriniagaat pillugu oqaaseqaqquneqarami.

Tamatumunngali atatillugu Putinip ikinngutinnersumik nipeqarluni, USA-p aamma Ruslandip ullumikkut akerariinnginnerat erseqqissarpaa.

- USA-p akeraatut inissisimajunnaarnikuuvugut. Ullumikkut suleqatigiippugut, Putin oqarpoq.

USA Polenimi raketsinik qulinik inissiiniarpoq taakkualu assersuutigalugu Iranimiut raketsit igeriussaat USA-mut aallaraluartut suujunnaarsissinnaassavaat.

Raketsit igeriuttakkat Polenimi inissinneqartussat taakkua russit atominut sakkussaasiviinik suujunnaarsitsisinnaanerannik oqartoqarnera USA-mi Washingtonimiit eqqunngitsuunerarneqarpoq.