Vivip taxarfigisimasaa ujaarilerpaat

Vivi Inger Kristiansenip, 30-nik ukioqartup, timaa Ringstedip eqqaani orpippassuarni sapaammi maajip ulluisa pingajuanni nassaarineqarpoq, kinalu toqutsisuusimanersoq, Vivilu sooq toqunneqarsimanersoq politiit maannamut suli paasinngilaat.

- Paasivarput Vivi taxangaatsiartarsimasoq, taxartartorlu aalajangersimasoq akulikitsumik ingerlatsisorisarsimagaa. Taxartartoq taanna assut attaveqarfigerusupparput, Sjællandip Qeqqani Kitaanilu Politeeqarfimmiit paasiniaasut pisortaat, René Frederiksen,, TV2-mi aallakaatitami "Station 2"-mi, paasissutissaasinnaasunik nutaanik ujartuinermi, ippassaq unnukkut oqarpoq.

Vivi Kristiansen aasaq kingulleq periarfeerunneqarpoq. Kingullermik takuneqarpoq juulip ulluisa qulingiluaanni 2008. Qaammatit qulit qaangiuttullu Vivip timaa orpippassuarni, Haraldsted Skovimi, nassaarineqarpoq - Sorøvejimi kingullermik takuneqarfianit kilometerinik tallimat missaannaannik ungasitsigisumi.

- Misissueqqissaarpugut. Sulili pasineqarsinnaasunik nassaanngilavut, René Frederiksen oqarpoq. Taxartartoq paasissutissanik pingaarutilinnik peqariataarsinnaammat assorsuaq oqaloqatigerusukkaluarparput, René Frederiksen naggasiivoq.