Vivip arnaa neriuutaarukkaluttuinnarpoq

Vivi Inger Kristiansenip arnaa, Augustine Kristiansen taassumalu najugaqataa, Jan Andersen Ringstedip avatinnguani angerlarsimaffiannut Danmarks Radiomiit apersoriartorpaat.

- Sumiittoq nalulluinnarpara, kiisa neriuutaarutilerpunga, Augustine Kristiansen oqarpoq.

Pingasunngornermili juulip ulluisa arfernganni panini tusarfigaa – taamanili tusagassiuutitigut, kiisalu politiit qimmilisartut qulimiguullillu atorlugit ujaarineqaraluarpoq, sulili Vivi Inger Kristiansenip sumiissinnaaneranik paasissutissamininnguanilluunniit nassaanngillat.

Augustine Kristiansen oqarpoq, naapitaasa tamarmik nuannarisarmassuk, Vivi-p ajortumik piniarneqarsimanissaa takorloorsinnaanagu, susoqaraangallu oqarasuaamminik angallattakkamik nalunaartuaannaraluartoq, ujarneqarneralu sivitsoriartortillugu panini ajunngitsoq takoqqissallugu ilimagiunnaaraluttuinnarlugu.

- Sianitivut sukaqqaqaat, sunaluunniit nipinnguaq tusaallugulu nukillaangajattarpunga, iluamillu sinissinnaananga. Matukkut kasuttortoqaraangat ingerlaannaq eqqarsartarpunga; politiinuku ajortumik tusarliiartortut ?!!, Augustine Kristiansen oqaluttuarpoq.