Vivian: Siuttoq tusarnaarsinnaasariaqarlunilu naaperiuteqarsinnaasariaqarpoq
Avissaartuutsitsisut ukkanneqartupilussuusimasut, Vivian Motzfeldt isumaqarpoq.
Pitsaanerunermik oqaloqatigiissinnaaneq, taassuma ilaatigut anguniarniarpaa.
- Inuiaqatigiinni politikkikkut killiffik arlaatigut pisariaqartitsisoq, unikannerluta immaqa annerusumik oqaloqatigiinnermik aammalu annerusumik tusarnaarsinnaanermik peqarluta ingerlatsigutta tassuunga paaseqatigiinneq annerusoq pissarsiarineqarsinnaasoq, Vivian Motzfeldt oqarpoq.
AAMMA ATUARUK Vivian Motzfeldt Siumumi siulittaasunngorusuttoq
Avissaartuukkunnaartoqassappallu siuttup isummanik assigiinngitsunik tusarnaariarluni naapeqatigiissuteqarniarsarisinnaasariaqartoq, Vivian Motzfeldt oqarpoq.
Siumumili sineriak tamakkerlugu ilaasortaqartumi isummat amerlasoorpassuupput.
Maannalu siulittaasoq, Kim Kielsen, immikkoortortaqarfinnit ataasiakkaanit arlaleriarluni tunuaqquneqartareerpoq.
Kingullermik Inatsisartuni ilaasortat arfinillit taamanilu naalakkersuisoq Erik Jensen tunuaqqusipput.
Siumumilu isummat assigiinngitsorujussuusinnaasut, Vivian Motzfeldt oqarpoq.
- Tamatta aggerfitsinninngaanniit unammillikkagut maannga annguttarpagut, soorunami iliuuseqarfigerusullugit. Tassuunakkullu Siumumi nukittoqutitut Siumumi isigineqarsinnaavoq.
AAMMA ATUARUK Kruse: Kielsen Siumup siulittaasuattut sassaqqissaaq
- Qanorluunniit taasinnaavat, avissaartuunnertut imaluunniit nukittoqutaasutut, soorunami isummat aporaaffiit amerlasaqaat, sinerissami aggerfitsinnit unammillikkagut assigiinngimmata.
- Isummallu taakkua naapitinneqarnissaat, tusarnaarnissaq taavalu pitsaanerpaamik qanoq alloriaqatigiinnissamut siunnerfileeqatigiinneq, tassaasorivara siuttup annerpaamik piginnaasaqarfigisariaqagaa. Tassa tusarnaarneq taavalu isummanik naapisitsiniaaneq,
Vivian Motzfeldt taama oqarpoq, nangillunilu oqarluni, siuttup naapeqatigiissutigineqartut inuiaqatigiinnut erseqqissumik paasissutissiissutigisinnaasariaqarai.
Siuttorlu kisimiilluni aaliangiisuusussaanngitsoq, Vivian Motzfeldt oqarpoq.
AAMMA ATUARUK Tusagassiuutit: Erik Jensen naalakkersuisuujunnaalerpoq
- Siuttoq aamma tassaasussaavoq, inuiaqatiminut tusarnaarsinnaasoq aammalu tusarnaakkani aallaavigalugit siunnerfiliisinnaasoq.
Taava nammineq eqqaariarakku, siuttoq tassaasussaanngitsoq kisimi isummani atorlugu aqutsisoq. Massakkut taamaannginnami?
- Taanna pinngilara, kisiannni siuttutut piginnaasat pigisariaqakkat tassaniissorivakka, Vivian Motzfeldt oqarpoq.
