3,5 millionit koruunit nunatta karsianit ICC-mut siorna aningaasaliissutigineqarput. Ukioq manna 3 millionit koruuninut ikilineqarput. 2021-milu 1,5 millionit koruuninut ikilineqaqqissallutik. (Toqqorsivimmit assi)Assi: KNR / Malik Brøns

Vivian Motzfeldtip ICC-mut aningaasaliissutinut ikilisaasoqartarunnaarsinniaraa

Naggueqatigiit inuit pillugit sulineq pingaaruteqaqimmat ICC-mut aningaasaliissutit ikilisaavigineqartariaqanngitsut, Inatsisartuni siulittaasoq isumaqarpoq.

Kinaassuserput sanngiillisarnagu nukittorsagassaraarput. Inatsisartuni siulittaasoq, Vivian Motzfeldt, Siumumeersoq, taama oqarpoq.

Taanna isumaqarpoq, ICC-mut aningaasaliissutit 2020-mut aningaasanut inatsimmi ikilisaaffiginiarneqartut immikkorluinnaq nalilersuiffigineqaqqittariaqartut.

- Nukittulluta nunarsuarmioqataassagutta nammineq pitsinnik naleqartitatsinnillu aallussinerput annertusarneqartuartariaqarpoq. Inuiattut ima ikitsigaagut suulluunniit pigisavut kinaassutitsinnut inuiaassutitsinnullu iluaqutaasut tamarmik nukittorsarneqartuartariaqarlutik, Vivian Motzfeldt tusagassiutinut nalunaarummi taama allappoq.

ICC-mut aningaasaliissutit ikilisaavigineqartut

3,5 millionit koruunit nunatta karsianit ICC-mut siorna aningaasaliissutigineqarput. Ukioq manna 3 millionit koruuninut ikilineqarput. 2021-milu 1,5 millionit koruuninut ikilineqaqqissallutik.

Nunarsuarmi inuttaaqataasugut tamattaalluta 7,8 milliardiuvugut. Issittumi inuiaat najugaqartut tamarmik 4 millionit missarluinnaaniilluta, taakkunanngalu naggueqatigiit inuit 160.000-it missaannaaniilluta.

- Kisitsisinngortitsinerup takussutissaqartippaatigut malugineqangaarnata inuiattut naleqartitavut, kulturerput oqaatsivullu kinaassutsitta tunngavigisaat tammariaannaasut, Vivian Motzfeldt oqarpoq.

Nunarput siulittaasoqarfimmi 2022-imi akisussaasuulissasoq

Vivian Motzfeldt isumaqarpoq, ICC-mut aningaasaliissutinut ukiuni tulliuttuni annikillisaanerit allanngortinneqartariaqartut.

- Tulluartuusorinngilara ukiorpassuarni suleqatigiinnerup pitsaasorpassuarnik inerititaqarfiusup aningaasanik ikilisaanerup malitsigisaanik unittoortinniarneqassappat, pingaartumik nunatta ICC-mi siulittaasuuffimmik tigusinissaa 2022-imi pisussaq eqqarsaatigalugu, Inatsisartuni siulittaasoq siumumeersoq, Vivian Motzfeldt, taama allappoq.

Qanortoq ukioq aallartisimaligarput manna politikkikkut naaperiaasinnaassuseqarluta piumassuseqarfigigisigu, ungaannaq isiginata – ukiunulli arlariinnut siumut sammisumik naaperiaaqatigiinnermik isumaqatigiissuteqarluta, Nunatsinneersumillu ICC-mi siulittaasoqalernissaa atorluarlugu Nunarput avammut kusanartumik maligassiuerpalaartumillu nittarsaatsigu, Vivian Motzfeldt ICC-mut tapersiilluni taama allakkani naggaserpai.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat