- Pitsanngortariaqartutut isigisaqaruma aamma atukkat pitsaanerusutut ingerlanneqarsinnaanerannik naliliiguma, taava tamakku tamarmik nammineq iliuuseqarnissannit tunngaveqartut perorsagaangama.Assi: KNR / Malik Brøns

Vivian Motzfeldt: Siulittaasunngussaguma tusarnaartuullungalu naaperiaasassaanga

Siumut siulittaasussaminik sapaatiuppat qinersissaaq. Siulittaasunngorniuttut pingasuupput - taakkuali sunik qineqqusaaruteqarpat? Vivian Motzfeldtip akissutai uani atuakkit.

Siumut tallimanngorpat kiisami ataatsimeersualissaaq. Partiilu siulittaasumik siulersuisunillu sapaatiuppat qinersissaaq.

Vivian Motzfeldt, Kim Kielsen Erik Jensenilu siulittaasunngorniuttuupput.

AAMMA ATUARUK Kim Kielsen qineqqusaaruteqartoq: Nunaqarfinni inuusuttut internet atorlugu ilinniassasut

Vivian Motzfeldt, sooruna Siumumut siulittaasunngorniarlutit sassarpit?

Siumup ataatsimeersuarnissaa

 

Siumut tallimanngorpat ataatsimeersualissaaq. Partiimeersut 70-it missaat peqataassapput.

 

Ataatsimeersuarnermi oqaluuserisassat naatsumik :

 

Tallimanngorneq: Ataatsimeersuarneq nunatta immikkoortuini siulersuisunik ataatsimiititsinertalimmik worhshoppernertalimmillu ammarneqassaaq.

 

Arfininngorneq: Partiip anguniagai siunnersuutillu pillugit oqallinneq.

 

Sapaat: Oqallinneq, naatsorsuutinik saqqummiineq, siulittaasumik siulersuisunillu qinersineq.

- Pitsanngortariaqartutut isigisaqaruma aamma atukkat pitsaanerusutut ingerlanneqarsinnaanerannik naliliiguma, taava tamakku tamarmik nammineq iliuuseqarnissannit tunngaveqartut perorsagaangama.

- Piffissami matumani siulittaasutut pisariaqartinneqartorpassuit tunniussinnaasorigakkit siulittaasutut sassarpunga.

Siumut Nuuk sapaatiummat ullup qeqqaniit nereqatigiititsivoq. Siumut nunarpullu siuttoqaratik aqunneqartutullusooq maanna ittut, Vivian Motzfeldt oqarpoq. Inuiaat aqutsisunngortinneqaqqittariaqartut, taanna ilaasortanut nereqataasunut oqarpoq. 

- Oqaatsivut allaffissornermi pisortatigoortumik atorneqassasut, namminersornermut inatsimmi 2009-meersumi allaqqavoq. Tamannalu Siumumi ukiorpassuarni anguniagaavoq. Pissutsillu maanna taamaanngillat.

- Iniuaqatigiinni akuussaguit qaffasissumillu atorfeqassaguit, kalaallisut oqaaseqartuullutit piumaffigineqarputit qallunaat oqaasii piginnaasaqarfigissagitit. Marluinnilli oqaaseqartuunissaq qallunaatuinnaq oqaaseqartumut piumasaqaataanngilaq. Tassaniippoq equngassuseq annersaq, Vivian Motzfeldt oqarpoq.

Vivian Motzfeldtip qineqqusaarutai Siumup maanna siulittaasuata, Kim Kielsenip, qineqqusaarutaanut eqqaanarput. Nunatsinnut suliartortut nunatsinni atorfeqarniarunik oqaatsitsinnik kulturitsinnillu ilinniartinneqartalissasut, Kim Kielsen ilaatigut oqarpoq.

Vivi Motzfeldtili taama sukannertigiumanngilaq. Nunatsinnummi suliartortut ilarpassui nunatsinni sivikitsumik suleriarlutik angerlartarmata, tamarmik oqaatsitsinnik kulturitsinnillu ilinniartinneqartalertariaqarsorinngilai.

- Nalilersorneqartariaqarpoq. Aningaasarpassuit ilinniartitsinermut atugassat pineqarput, nunatsinnulli suliartortartut qiviaraanni agguaqatigiissillugu qaammatialuinnarni nunatsinniittarput. Nunatsinnili qallunaatut oqaasilippassuaqartoq aamma nalunngilara, taakkunanngalu nunatsinni najugaqaannarnissamik kissaateqartut periarfississallugit pitsaasorujussuussasoraara, taanna oqarpoq.   

Siulittaasunngussagaluaruit Siumut qanoq allanngortikkusuppiuk?

- Siulittaasunngussaguma pingaarnerpaatippara, siuttup piginnaaneqarfigisassaa tassaasoq, tusarnaarsinnaaneq naaperiaasinnaanerlu.

- Soorunami naalakkersuisoqatigiittoqarluni illuatungiliuttoqartarpoq. Eqqaamassavarpulli illuatungiliuttut aamma qinersiseqarmata. Taamaammat ataqqeqatigiittumik tamatigut oqaloqatigiissinnaaneq politikkip isumavigaa tunngavigalugulu. Amerlanerussuteqarnerli aallaavigalugu taanna amerlasoorparujussuartigut qaangiinnarlugu sulisoqartoq isumaqarpunga. Uangalu tamanna allanngortikkusuppara.

AAMMA ATUARUK Kielsen paatsuugassaanngitsumik oqartoq: Nunanit allanersunut politikkip tigunissaa piffissanngorpoq

Siulittaasutut suut marluk pingaarnerpaatillugit sulissutigissavigit?

- Inuit isertitamikkut naligiinnerusumik periarfissinneqassappata, pisortat suliffeqarfiutaat Nuummi katersuussimasut sineriammut siammartinneqartariaqarput. Taamaaliornikkut nunap immikkoortui pitsaanerusumik aamma periarfissinneqarsammata.

- Oqaatsittalu allaffissornermi pisortatigoortumik tamakkiisumik atulersinneqarnissaat sulissutigisassama pingaarnerpaat ilagaat.

Siumumi isumaqatigiinnginnertalimmik aalassassimaartoqartarpoq. Siulittaasutut partii qanoq ataatsimoortissaviuk?

- Siumumi pisoorsuuvugut. Inatsisartuni Qaanaaminngaanniit Ammassalik tikillugu issiatitaqarpugut. Tamatta aggerfigut assigiinngitsorpassuarnik unammilligassaqarput, tamaammat tupinnanngitsumik qulequttani amerlasuuni aporaaffeqartarpugut. Aporaaffiillu taakku pitsaasumik inerneqartinneqassappata, tusarnaarneq qulequttani naaperiaasinnaanermut aaqqiissutissanillu ujartueqatigiissinnaanermut piumassuseqarluartariaqarpugut. Isumaqarpungalu tamanna siuttup piginnaasassaani pingaarnertut inissisimasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat