Vivi Inger Kristiansenip toqutaanera suli paasisaqarfigineqanngilaq
Tammaaneqarneranit qaammatit qulit qaangiummata, ukiormanna maajip aallaqqaataani, tammaaneqarfimminit ungasinngitsumi Vivi Inger Kristiansen toqutaasimasoq orpippassuit akornanni nassaarineqarpoq.
Pinerluuteqarnerup taama sivisutigisumik qaangiutereernerani misissuiffigeqqissaarnissaa ajornaatsuinnaanngilaq, taamaattorli Sjællandip Qeqqani Kitaanilu politiit misissuinertik ingerlatiinnarpaat, aviisimi 'Dagbladet Ringsted'-imi taama allaaserinnittoqarpoq.
- Misissuineq suli sivisunerujussuarmik ingerlassinnaavarput. Misissugassatsinnik eqqaasassaarukkutta aatsaat unitsissinnaavarput. Politiinili misissugassatsinnik suli ujaasivugut, misissuinerpullu sivisunaarsinnaavoq, taama oqarpoq politikommissærip tullia René Frederiksen, Vivip toqutaaneranik misissuinermi pisortaasoq. Taassuma ilanngullugu oqaatigaa, inuinnarnit suli saaffigineqartarlutik.
- Saaffiginnissutit amerlanerit Ringstedimi kia eqqumiitsumik pissusilersorneranut tunngasuupput, kisianni tikkuussisumik saaffiginnittoqarnissaa suli amigaatigaarput. Tamannami suliap sivitsoraluttuinnarnerani iluaqutaassagaluaqimmat, René Frederiksen 'Dagbladet Ringsted'-imut ullumi taama oqarpoq.