Vivi Inger Kristiansenip arnaa: Nalornineq ajornerpaavoq
Arnaata Augustine Kristiansenip neriuutigaa panimmi timaa ungasinngitsukkut tigusinnaassallugu:
- Neriuppugut timaa ungasippallaanngitsukkut tigusinnaassallugu iluamik ilisinnaaniassagatsigu. Pinerliisimagunartoq pinerliisimagunartulluunniit nassaarineqarpata inuunitta oqinnerulernissaa neriuutigaarput, kisianni sivisussagunarpoq. Naluaraluunniit qanoq sivisutigissanersoq, Augustine Kristiansen oqarpoq, nangillunilu:
- Qanoq pisoqarpiarsimanersoq ilisimanagu ajorpoq, assut ajorpoq, aamma timaa imaaliinnarlugu tunniussinnaannginnamikku, suli misissuiffigisussaagamikku, Vivi Inger Kristiansenip arnaa oqarpoq.
Ilaquttanit ikinngutinit allanillu tapersersorneqarnertik Augustine Kristiansenip qujamasuutigaa, namminerlu angajoqqaavi Danmarkimut maanna tikinnikuupput.
Augustine Kristiansen qimuttuitsunut ilaalluni Københavnimiit Ringstediliartoq attaveqarfigaarput.