Vittus Qujaukitsup oqaasii illuatungilerpaat
- Uani aningaasanut inatsimmi isumaqatigiissuteqarnermi partiit taakku peqataannginnerannut peqqutaasa annerpaat uaniippoq aningaasanut inatsimmi isertitassatut tikkuussassaat ersinngilluinnarsimammata. Taamaattumik tamannarpiaq peqqutigalugu ajoraluartumik naggataagut aningaasanut inatsisissap akuersissutigineqarnissaanut soorunami aamma namminneq akerliupput, Aningaasaqarnermut Naalakkersuisoq Vittus Qujaukitsoq arfininngormat taama oqarpoq.
Vittus Qujakitsulli taama oqarnera Jens B. Frederiksenip illuatungilerpaa:
- Uanga akuttusoorujussuarmik inuit sallunerartarpakka, kisianni massakkut allatut ajornaqimmat taama oqaatigisariaqarpara. uagut Demokraatininngaanniit tunuarsimaarfiginikorujussuuarput inuiaqatigiinnut aningaasartuutaasussanik siunnersuutinik saqqummiussissalluta, nalunnginnatsigu Nunarput aningaasakilliortoq. Siunnersuulli aningaasartuutinik imaqarsinnaasoq ataaseq saqqummiunnikuuarput, tassalu ingerlatseqatigiiffiit akileraartarnerisa appaaffigineqarnissaat, kisianni tassani siunertaanikuuvoq suliffeqarfiit suli amerlanerit pilersinneqassasut, taamaalinikkut suliffissaaleqineq akiorneqarsinnaalluni, taamaalinikkut aamma akileraartartunit isertitat suli annertusarneqarsinnaallutik, Jens B. Frederiksen oqarpoq.
Inuit Ataqatigiillu tungaaninngaanniit piviusorsiunngitsunik saqqummiussisoqarsimaneranik oqalunneq, Naaja Nathanielsenip aamma ilisarisinnaanngilaa:
- Akerlianik oqarusuppunga akileraartarnerup aaqqissuuteqqinneqarnissaa, inunnillu isumaginninnikkut aningaasartuutit aaqqissuuteqqinneqarnissaat siunnersuutiginikuugatsigu, soorlu aamma ineqarnermut politikki, sanaartornermullu politikki allanngortinneqarsinnaasut siunnersuutiginikuugipput. Allannguisoqassappallu inunnik isumaginninnikkut sullissinermi eqquinerlunnginnissaat siunnersuutigalutigu. Naalakkersuisulli tamakkuninnga pingaartitsinngitsut takusinnaavarput, Naaja Nathanielsen, Inuit Ataqatigiinneersoq oqarpoq.
