Vittus Qujaukitsup isumaa taamaaginnarpoq
Taama aalajangiisoqarnera oqallisigineqaqaaq, tassami aalajangiineq Kommuneqarfik Sermersooq avaqqutiinnarlugu aamma kommuninut ataatsimoortumik tapiissutit juulimi isumaqatigiissutigineqarnerannit qaammatit marlussuit qaangiutiinnartut pimmat. Vittus Qujaukitsup , kommuninut tapiissutinik allannguinermini allannguutit kommunit pingasut isumaqatigiinniakkani Siumumeersunik borgmestereqarnerat aamma illoqarfiit pingaarnersaata IA-meersumik borgmestereqarnera pissutaasut, akissummini ilumuunnginnerarpaa.
Vittus Qujaukitsup akissummini arlaleriarluni erseqqissarpaa, aalajangiinermini kommuunit akornanni aningaasaqarnikkut assigiinnginnerujussuaq taamaallaat isiginiarsimallugu. Taassuma innersuussutigaa, kisitsisit 2011-meersut naapertorlugit Kommuneqarfik Sermersuumi innuttaasup ataatsip isertitai kommunini allani innuttaasup ataatsip isertitaanit 10 procentit missaannik qaffasinnerummata.
Taassuma oqaatigaa, kommunit pingasuusut innuttaminnut ataatsimut 10 koruuninik atuigaangata Kommuneqarfik Sermersooq innuttaminut ataatsimut 11 koruuninik atuisartoq.
Tamatuma peqatigisaanik taanna isumaqarpoq, kommunit akileraartarnermut procenterititaat atuuttut ilanngunneqarpata aningaasaqarnikkut assigiinngissutsit annertunerulertartut. Taassuma tikkuarpaa Kommune Kujalleq aamma Qaasuitsup Kommunia kommunimut akileraarutini qaffasinnersaammata 28 procentiugamik, Qeqqatali Kommuniani 26 procentiulluni, Kommuneqarfilli Sermersooq appasinnerpaalluni 25 procentimik akileraartitsisartoq.
Vittus Qujaukitsup tunngavilersuutaani kommunit inuttussusaasa allanngoriartornerat aamma taaneqarpoq. Tassami Qaasuitsup Kommuniani innuttaasut 7 procentimik ikileriarmata aamma Kommune Kujallermi 10 procentimik ikileriarlutik.
Illoqarfiit Pingaarnersaata kommuniata kommuninut allanut akiliutigisartagai 100 millionit koruunit missaanniipput, maannalu Namminersorlutik Oqartussat kommunimut tassunga ataatsimoortumik tapiissutigisartagai 20 millionit koruuninik ikileqaqqissapput, naak innuttami amerliartornerisigut aningaasaliinissamik pisariaqartitsigaluaqaluni.
Taamali tunngavilersuineq Vittus Qujaukitsup akuersaanngilaa. Taassumami erseqqissarpaa, ukiuni tulliuttuni kommunit akornanni agguaaqqittarnermi annertunerusumik pilersitsinissaq, Naalakkersuisut anguniagarigaat.
- Naalakkersuisut piffissami aggersumi kommunini akileraartarnermik nalimmassaaneq aamma ataatsimoortumik tapiissutit agguaattarnerat 2015-imi atuutilersussaq pillugu kommuninik oqaloqateqarneq aallartissagaat, Vittut Qujaukitsoq akissumini allappoq.
