Assi: Naalakkersuisut

Vittus Qujaukitsoq: Korea Kujalliup niueqatigineqalernissaa ilimanaateqarpoq

Koreap Kujalliup Danmarkimi aallartitaa, Young-sam Ma Kalaallit Nunaannut sapaatip akunnerani uani tikeraarpoq. Tamannalu Kalaallit Nunaata pitsasumik pissarsiaqaatigisinnaagaa Naalakkersuisut allapput.

 

Young-sam Ma-p Nuummiinnermini Ilisimatusarfimmi immikkut ittumik pilersitsivoq taasamik 'Korea cornerimik', tassa 'Koreap terqeqquanik' kalaallisut taaneqarsinnaasumik. Taamalu pilersitsineq Koreamik illugiilluni suleqateqarnissamik pimoorussisoqartoq, Inuussutissarsiornermut, Suliffeqarnermut Nunanullu allanut Naalakkersuisoq, Vittus Qujaukitsoq oqarpoq.

 

- 'Koreap teqeqquanik' ammaanermi Koreap peqataalluarnermigut uppernarsarpaa, illugiilluni suleqatigiinissaq pimoorunneqartoq, tassuumakkullu Kalaallit Nunaata Koreallu akornanni paarlaasseqatigiinneq annertusarniarneqarluni - niuernerinnaanngitsukkut aningaasaliinerinnaanngitsukkullu, kisiannili ilinniartut Issittoq pillugu ilisimasaasa paarlaasseqatigiinnerisigut tamanna aamma pissaalluni, Vittus Qujaukitsoq tusagassiutinut nalunaarummini taama oqarpoq.

 

Young-sam Ma-p Nuummut tikeraarnermini aamma ataatsimeeqatigai Aningaasaqarnermut Aatsitassaqarnermullu Naalakkersuisoq taamatullu Ineqarnermut, Sanaartornermut Attaveqaatinullu Naalakkersuisoq aamma ataatsimeeqatigalugu.

 

Suliffeqarfiit Royal Greenland aamma Greenland Holding, Young-sam Ma-p aamma pulaarpai. Taakkunani pingaarnertut oqaluuserineqarlutik niueqatigiinnissaq aamma Korea Kujalliup Nunattalu suleqatigiinnerulernissaat, tassani eqqartorneqarnerullutik aalisarnermik, aatsitassarsiornermik, ilisimatusarnermik takornariaqarnermillu suleqatigiinnissat. Taamalu suleqatigiinnissamik oqalunnerit siunissami qulakkeerniagassaasut, Naalakkersuisut tusagassiutinut nalunaarutaanni atuarneqarsinnaavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl