Vittus Qujaukitsoq isornartorsiorneqangaatsiarpoq

Aningaasanut inatsisissamut siunnersuut, Kalaallit Nunaanni Kommuneqarfiit Kattuffiat, KANUKOKA, taamaalillunilu kommunit tamaasa, peqatigalugit, juulimi isumaqatigiissutigineqartoq, Naalakkersuisut imaaliallaannarlutik allanngortimmassuk, annilaarnartutut tupaallannartutullu partiip nalilerpaa.

Aalajangerneq  naalakkersuisoqatigiinnut, Partii Inuit-nut, nipangersaanertut Inuit Ataqatigiit nalilerpaat, taakkumi aningaasaqarnermut inatsisissatut siunnersuut inuiaqatigiinnut naapertuunnerusoq ujartormassuk.

- Aalajangerneq naligiinnerunermik atugarissaarnermilluunniit pilersitsinavianngilaq, Inuit Ataqatigiit tusagassiuutinut nalunaarumminni erseqqissaapput.

Isumaqaraannili Kommune Kujallermut Qaasuitsullu Kommunianut ataasiaannarluni aningaasaminernik tunisigaanni naligiinnerusumik pilersitsisoqarsinnaasoq, tamanna meerarpallanneruvoq. Taama aalajangerneq Tunumi innuttaasunik, Kommuneqarfik Sermersuumut ilaasunik, eqquinissaa pingartumik eqqarsaatigigaanni.

- Inuit Ataqatigiit Naalakkersuisunut kaammattuutigissavaat nutarsaanernik, innuttaasunut tamanut nakussassaataasunik, sulissuteqarnissamut naalakkersuinikkut sapiissutsimik takutitseqqullugit. Taamattaarlu suliffissanik ataavartunik, ilinniartutut suliffissanik, suliffissaarunermillu akiuiniarnermi Naalakkersuisut politikkiat qanoq ittuunersoq ersarissumik nalunaarutigeqquarput, Inuit Ataqatigiinnit kaammattuipput, KANUKOKA-lu aamma isornartorsiorpaat, oqarlutik, kommuninut ataatsimoortumik tapiissutissat pillugit isumaqatigiissut aalajangiusimaannarsimassagaluaraat.