Vittus Qujaukitsoq: Carsten Frank Hansenimut tunngatillugu suliaq alianarluinnaqqissaarpoq

Atorfinitsitsiniarnermut ataatsimiititaliami kukkusoqarsimasoq, akisussaasuusut tamarmik oqaatigaat. Aamma Naalakkersuisoqatigiit akornanni taama oqartoqarpoq.

- Pisoq alianarluinnaqqissaarpoq, Carsten Frank Hansenillu atorfinitsinneqarnissaanut atatillugu oqaaseqaatit pissarsiarineqarniarneranni kukkusoqarsimalluni, Aningaasaqarnermut Naalakkersuisoq Vittus Qujaukitsoq Radioaviisimut oqarpoq.

Atorfinitsitsiniarnermut ataatsimiititaliap sulisimanera Vittus Qujaukitsup apeqquserpaa, Naalakkersuisoqarfiup siornatigut pisortarisimasaanut, Jan H. Lynge Pedersenimut kingoraartissap nassaariniarneqarnerani suliaq apeqquserlugu.

Vittus Qujaukitsup naalakkersuisoqarfiani qullersaq, Carsten Frank Hansen, atorfittaamini tallimanngormat sulilerpoq.

Taannali Danmarkimi piginnaatitaanerminik atornerluisimasutut, tassa aningaasanik peqquserluuteqarsimasutut, pasineqartoq, ippassaq unnukkut saqqummiunneqarpoq.

- Pisut alianartut nalilersoqqittariaqarpavut, pisortani atorfinitsitsiniarnermi periutsit aqqutigalugit nutaamik maanna atorfinitsitsiniassalluta, Vittus Qujaukitsoq oqarpoq.

Taanna aperaarput atorfinitsitsiniarnermi ataatsimiititaliaq atorfinitsitsiniarnermut atatillugu periutsit malilluarsimanerai, akivorlu:

- Carsten Frank Hansenimut tunngatillugu oqaaseqaatit naammaginartut pissarsiarineqarsinnaasimanngillat, tamannalu ajuusaarnarpoq. Atorfinitsitsiniarnermullu ataatsimiititaliap sulisimanera apeqqusertariaqarluni, Vittus Qujaukitsoq oqarpoq.

Jan H. Lynge Pedersen soraarsitaammat 2 millionit koruunit sinnerlugit tunineqarpoq, taassumallu kingoraartissaanik maanna ujarlertoqartariaqalissalluni.

Carsten Frank Hansenimut tunngasut Berlingske Tidendemi ippassaq saqqummiunneqareersullu, Naalakkersuisut siulittaasuata Aleqa Hammondip Naalakkersuisoqarfiani pisortaq Svend Hardenberg kingorna nalunaaruteqarpoq. Taanna atorfinitsitsiniarnermi ataatsimiititaliami siulittaasuuvoq, atorfinitsitsiniarnermilu kukkusoqarsimasoq, taassuma nassuerutigaa:

- Aningaaserivimmit oqaaseqaatit aaneqarsimapput, paasissutissallu Greentop Greenlandimit aamma aaneqarsimallutik. Paasissutissalli atorfinitsitsisinnaanermut apeqqusiisinnaasut pissarsiarisinnaasimanngilagut, tamannalu ajuusaarnarpoq, Svend Hardenberg oqarpoq.

Siunnersortitut suliffeqarfik Ramsdal A/S Carsten Frank Hansenip storfinitsinniarneqarnerani atorfinitsitsinermut ataatsimiititaliamit ikiortigineqarpoq.