Vittus Qujaukitsoq: Amigartoorutissat affaannanngortinneqarput
Anguniakkat, Aningaasaqarnermut Nunamullu Namminermut Naalakkersuisup 2014-imut Aningaasanut Inatsisissap aappassaaneerneqarnissaanut aningaasalersornissaannik nassaarussimasai. Aningaasaqarnermut Naalakkersuisoq Vittus Qujaukitsoq Siumumeersoq taama nalunaaruteqarpoq.
Aningaasanut inatsisissatut siunnersuuteqarnermi 100 mio. koruuninik amigartooruteqarnissaq missingersuutigineqaqqaaraluarpoq. Naalakkersuisulli maanna paasissutissiissutigaa taamatut amigartooruteqarnissaq maanna affaannanngortinneqarsimasoq. Aningaasallli suminngaanneernerni Aningaasaqarnermut naalakkersuisup oqaatigiumanngikkallarpaa.
Vittus Qujaukitsulli aningaasanut inatsisissatut saqqummiussamini, nammineq isumani malillugu, partiit tamaasa Nunarpullu tamaat soqutigalugit suliarisimallugu aamma oqaatigaa.
- Partiit tamaasa pitsaasumik oqaloqatigisimavakka. Tamarmik assigiinngitsunik aallaaveqaraluarput, kisianni allannguutissatut siunnersuutit uku atorlugit partiit tamarmik kissaataat piviusunngortinniarsimallutigit. Tamatumani Kalaallit Nunaat tamakkerlugu aaqqiissutissanik nassaarniarsimavugut, Vittus Qujaukitsoq oqarpoq nangillunilu:
- Nunatsinni pissutsit tamanut pitsanngornissaat, Naalakkersuisunut pingaaruteqarpoq. Taamaasiorpugut, sanaartornerup siammarterneratigut tamatumunngalu ilutigitillugu suliffissaaleqinermik akiuiniarnerput annertusillutigu. Aamma nunamut tamarmut iluaqutaassaaq, kræftip akiorniarnerani pilersaarutip aallarnisarneqarnissaanut aningaasaliissuteqarnitsigut.
Tamatuma saniatigut Naalakkersuisut tamat oqartussaaqataanerat nukittorsarniarlugu 1 mio. koruuninik aningaasaliissuteqarput, kattuffiillu politikkimut attuumassuteqanngitsut suliniutinut annertuunut immikkut ilisimasalinnik ikiorneqarnissaminnut aningaasanik qinnuteqarsinnaapput. Nuummi inissianik tuniniaanissamik suliniut iluatsinngitsoortoq aamma ingerlanniarneqaannassaaq. Tuniniaanissarlu ukiut sisamat ingerlanerini pisussanngortinneqarsimavoq.
Naggasiutigalugu Vittus Qujaukitsup maluginiarpaa, isumaqatigiinniarnerni aalisarneq aamma isumalluutinik pissarsiassat akileraarusertarnerannut politikkikkut isumaqatigiittoqartorujussuusoq. Taamaattumik Naalakkersuisut inuussutissarsiortut aningaaseriveqarnermillu sullissisut tuaviornerpaamik sulinermi peqataatinniarpaat.
