Assi: KNR

Kielsen: Vittus peqateqarani maalaarummik nassiussivoq

Naalakkersuisut Danmark Naalagaaffiit Peqatigiinnut maalaarutigaat, Vittus Qujaukitsulli naalakkersuisoqatini avaqqutiinnarlugit maalaarut nassiussimavaa.

Danmarkip Naalagaaffiit Peqatigiinnut maalaarutigineratigut Naalakkersuisut sakkortuumik iliuuseqarput.

Maalaaruteqarnerli Naalakkersuisunit ataqatigiissaakkamik iliuuserineqanngitsoq Naalakkersuisut siulittaasuata ullumi akunnermi ataatsimi apeqqarissaarfigineqarnermini naqissuserpaa.

Ineqi Kielsenip apeqqutaanut akissuteqarluni Naalakkersuisut siulittaasuata Kim Kielsenip erseqqissumik oqaatigaa. Naalakkersuisut paasiteqqaarnagit Qujaukitsoq peqateqarani Naalagaaffiit Peqatigiinnut maalaarummik nassiussisimavoq.

Qujaukitsoq piginnaatinneqarsorisoq

Qujaukitsup ullumi siusinnerusukkut erseqqissaatigigaluarpaa suliami piginnaatinneqarnini qulakkeereersimallugu.

- Naalakkersuisuni kingornalu aamma ataatsimiititaliami (Inatsisartut nunanut allanut sillimaniarnermullu ataatsimiititaliaat, aaqq.) tunuliaquserneqarnera qulakkeeqqaarpara, Qujaukitsoq KNR-imut taama oqarpoq.

Naalagaaffiit Peqatigiinnut maalaarummik nassiussisimanerit pillugu ataatsimiititaliaq ilisimatinneqarpa?

- Soorlu oqaatigereeriga, danskit nunanut allanut ministererisimasaannut allakkat oqaluuserineqareerput, aamma Inatsisartut nunanut allanut sillimaniarnermullu ataatsimiititaliaannut tunngatillugu oktobarimi, Qujaukitsoq taama akivoq, Naalakkersuisulli Inatsisartullu isumaqatigiissuteqarfiginerisigut maalaarut nassiussimanerlugu oqaaseqarfigerusunngilaa.

Sukap misissuiffigissagaa

Maanna naalakkersuisuusup Suka K. Frederiksenip suliap ingerlarnga pillugu nassuiaammik suliaqarnissaa Kim Kielsenip naatsorsuutigaa.

Ineqi Kielsenip KNR-imut oqaatigaa Suka K. Frederiksenip isumasiorneratigut suliamut tunngatillugu qanoq pisoqarsimanera ataatsimiititaliap paasiniarniaraa, tamanna sioqqullugu pisoq oqaaseqarfigisinnaanagu.

- Malitseqartitsilluta ataatsimiittussaavugut qanorlu aaqqiissuteqartoqarsinnaasoq paasiniassavarput, Ineqi Kielsen taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat