Vittus: Naalakkersuisut akisussaassusilimmik aningaasaqarnikkut politikkimik ingerlatsiniarput

Aningaasaqarnermut naalakkersuisuusimasup taartini Vittus Qujaukitsoq sakkortuumik isorartorsiorlugu ippassaq tutsiuppoq, naalakkersuisullu siuliisa aningaasaqarnikkut politikkiannik nangitsiinnarnerarlugit. Tamatuma malitsigitillu Namminersorlutik Oqartussat tusagassiorfinnut nalunaaruteqarput, tassanilu Vittus Qujaukitsup Abelsen ilumuunnginnerarpaa.
maajip 07-at 2013 13:57

 

Qujaukitsup Naalakkersuisut siulii uparuarpai, aningaasaqarnikkut politikkimik saqqummiussaqarnissaminnut ukiut pingasut atorsimanerarlugit.

-Naalakkersuisut siusinnerusukkut oqaatigereerpaat, Naalakkersuisut Akileraartarnermut Atugarissaarnermullu Ataatsimiititaliarsuup angusai akuerineqartut, kisianni tamanna imaanngilaq, Naalakkersuisut ataatsimiititaliarsuup inassuteqaatai tamaasa malillugit naammassiniaraat. Naalakkersuisut siullermik inassuteqaatit peqqissaartumik misissussavaat tamatumalu kingorna inassuteqaatit politikkikkut piviusunngortinneqarsinnaanersut isummerfigissallugit, Vittus Qujaukitsoq isumaqarpoq.

Aningaasaqarnermut naalakkersuisunngortup Siumup naalakkersuisuutitaasa siunissami aningaasaqarnikkut politikkissamik qaqugu saqqummiussissanersut oqaatigissallugu qunuginngilaat.

-Naalakkersuisut aningaasaqarnikkut politikkianni titarnerit siulliit takuneqarsinnaalissapput ukiumoortumik Aningaasaqarnikkut Ingerlatsineq pillugu Nalunaarutip saqqummiunneqarneranut atasumik, nalunaarummilu tassani siunissami aningaasarsiornikkut suliassat pingaaruteqartussat qulaajarneqassapput kiisalu 2014-imut aningaasaqarnermut inatsisissatut siunnersuummi takuneqarsinnaassaallutik. Taakkua aggustimi 2013-imi tamanut saqqummiunneqassapput. Siunissaq ungasinnerusoq isigalugu aningaasanut inatsisit ataatsimoortumik aningaasaqarnikkut politikkimik tunngaveqassapput, taakkualu anguniakkanik iliuusissanillu siunissaq ungasinnerusoq isigalugu aningaasaqarnermik attanneqarsinnaasumik siunissamilu atugarissaarnermik qulakkeerisumik imaqassapput, Aningaasaqarnermut Nunamullu Namminermut Naalakkersuisoq Vittus Qujaukitsoq naggasiivoq.