Vittus Mikaelsen: Kommunip aningaasaqarnera ajortuaannarnikuuvoq

Taamanikkut borgmesteriusoq Jakob Sivertsen kommunalbestyrelsip ataatsimiinnerani oqarpoq; kommunip aningaasaqarnera ima ajortigaaq allaanngilaq immaqa qaartartup qaavani inissisimasoq qaartartorlu qaariaannaasoq, Vittus Mikaelsen oqarpoq.

Taassuma erseqqissaassutigaa kommunep aningaasaqarnera ukioq manna allaanerussuteqanngilluinnartoq.

- 1997-imi borgmesterinngorama 2000-ip tungaanut nalinginnaasumik budgeterput ingerlagaangat 8-9 mio. koruuninik amigartooruteqartarpugut kisianni ukiup naanerani amigartooruteqarneq ajorluta, oqarpoq, nangipporlu:

- Kommunip nakkutilliisuata kommunit tamakkerlugit sukaterinerata kingunerisaanik aningaasat tiguneqarsinnaasuinnaat atorlugit budgetiliortoqartalernikuuvoq, oqarpoq.

Vittus Mikaelsen erseqqissaavoq siusinnerusukkut budgetiliortarneq eqqarsaatigalugu ullumikkut allaanerunngilluinnartoq.

Aperaarput Thomas Kristensenip uparuaanera tassa Vittus Mikaelsenimik pisuutitsinera eqqarsaatigalugu maannalu oqaasii eqqarsaatigalugit taava imaannersoq nammineq Vittus Mikaelsen Tasiilap aningaasatigut inissisimanerlunneranut pisuusimanngitsoq?

- Uanga nammineerlunga iliuuseqarsinnaanngilanga kommunalbestyrelse tamakkivilluni budgeti aalajangertarpaa, taamaallaat uanga suliassarivara budgetip taassuma eqquutsinnissaa, Vittus Mikaelsen oqarpoq.

Taassuma erseqqissaassutigaa qinikkat ataasiakkaat taama isummersimassagunik namminneerlutik akisussaaffigissagaat.