Vittus: Ilorraap tungaanut alloriarneruvoq eqqortoq
Aningaasaqarnermut naalakkersuisup Vittus Qujaukitsup London Miningip piiaaviliornissaminut akuersissummik tunineqarnera nuannaarutigaa, suliniullu peqqissumik aatsitassarsiornermik ingerlatsinissamut aqqutissiuusseqataasussatut isigalugu.
- Soorunami suliniut taamatut annertussusilik aningaasanut inatsisitsinnut sunniuteqassaaq. Annertunerusunik akileraarutitigut isertitaqarnerulissutigissavarput aammalu aatsitassanut aningaasaateqarfeqarpugut nunatsinni innuttaasunut iluaqutaasussamik. Kisianni tamatumani sulisussat piginnaasaasigut qaffassaanissaq inuussutissarsiortullu suliniummut peqataanissaannut tamatta akisussaaffeqarpugut. Suliniummi peqataanikkut nunaqavissullu piginnaasaasa qaffassarnerisigut pigissaarneq atugarissaarnerlu aatsaat kivissinnaavagut, Qujaukitsoq nassuiaavoq.
Nunatta imartaani aalisakkat ikiliartuinnartillugit piniakkallu amerlassutsimikkut kinguariartuinnarfianni, Nunatta aningaasaqarnera ajutuuissussanngippat arlaatigut iliuuseqartoqartariaqarpoq. Piiaavinnillu suliffissuaqarneq siunissaq ungasinnerusoq eqqarsaatigalugu aaqqiissutaasinnaasut ilagilluinnarpaat.
Londin- Ullumikkut aatsitassarsiornermik pilersitsiniarluni suliniummi nunatsinnilu periarfissat tungaasigut alloriarujussuartoqarpoq. Kisianni aatsaat akuersissutit kingulliit tunniunneqareerpata ingerlatseqatigiiffillu sanaartornissamut aallarnisaatissanik aningaasaliissuteqareerpata, piiaaffissaq piviusunngortinneqassaaq. Naalakkersuisut neriupput, Aningaasanut Inatsisissatut Siunnersuutissanut aggersunut tamanna pisinnaasoq, tassani suliniutip sunniutai toqqaannartut toqqaannanngitsullu ilanngussinnaalissagatsigit.
