Vittus: Aningaasaqarnermut inatsit malillugit sulivugut

Radioavisip allagaatinik paasissutissinneqarnissamik kissaataa ulloqeqqalersoq akuerineqarluni Aningaasaqarnermut Naalakkersuisoqarfimmit akineqarpoq, tassanilu erserpoq Nunatta Karsia 282 millioner koruuninik amigartooruteqartussaassasoq.
novembarip 26-at 2014 18:17

Missingersuutit ilumut malinneqarnerannik nakkutilliineq novembarip 17-ianni Naalakkersuisoqarfimmit nammassineqarsimavoq. Missigersuutinilli nalunaarusiat oktobarip qaammataani naliginnaasumik saqqummiunneqartaraluartut tusarfitsinnit paasivarput.

 

Sooq aatsaat maannakkut Nunatta aningaasaqarneranut tunngasut, Aningaasaqarnermut Naalakkersuisuugallartup, Vittus Qujaukitsup saqqummiunnerai, radioaviisimit apeqqutigaarput. Taannalu siulermik ima akivoq.

 

- Uani eqqaamasariaqarpoq Naalakkersuisuugallartuni pisussaaffiit qanoq aggulunneqarsimanerat, uani avataaninngaanneersut assigiinngitsut assigiinngitsunik missingersuutit malitseqartinneqarnerat pillugu suaartaatigaat, sooq saqqummiunneqarsinnaanngila susassaqartunut avataaneersunut?

- Imaasiallaannarluta uagut missingersuutit malitseqartinneqarnerat pillugu saqqummiussuisinnanngilagut, Naalakkersuisuni suleriaaseqarpugut aamma inatsit tassani malillugu sulisussaavugut, taamaattumik suna tamaat avaqqutiinnarlugu suliassami aamma uani ingerlanissarput taanna pissusissamisuunngilaq. Aningaasaqarnermut Naalakkersuisuugallartoq taama akivoq.

 

Nunatta karsiata aningaasanik 282 millioner koruuninik amigartooruteqarnissaa partiit siulittaasuinut sooq saqqummiunneqarsimannginnersoq, Vittus Qujaukitsumut apeqqutigaara, taannalu imna akivoq.

 

- Tassa uani uanga Naalakkersuisuugallartutut Aningaasaqarnermut Nunamullu namminermut inatsisitigut pisussaaffikka tassani ersariivissumik aalajangersagaapput.

- Aamma taanna naapertorlugu Naalakkersuisuugallartuni tassa Inatsisartut Aningaasaqarnermut Akileraartarnermullu Ataatsimiititaliaat ilisimatipparput piffissaq eqqorlugu. Aningaasaqarnermut Naalakkersuisuugallartoq, Vittus Qujaukitsoq taama KNR-imut oqarpoq.