Assi: Ane-Marie Petersen / KNR

Vittus akitsuutit pillugit: Aap, annernarput pisariaqarpulli

Aningaasaqarnermut naalakkersuisup akitsuutinik qaffaaneq, inuiaqatigiit peqqinnerulernissaannik siunertaqarnerarlugu illersorpaa.

Pisiassanut mamakujunnut, imigassamut cigarrettinullu pilertortumik ataasinngormat akitsuusersuisoqareersorlu isornartorsiuinerit imaaginnavipput. Isornartorsiuisullu KNR-ip Brugsenimi sisamanngormat naapitaannit kisimi oqariartuutigineqanngilaq, sulinermimmi inuussutissarsiuteqartut kattuffiat aamma isornartorsiuivoq 

Inuiaqatigiit peqqinnerulernissaat akitsuusersuinermi Naalakkersuisunit siunertarineqarnera SIK-p iluatsissanersoq qularaa.

Inuit ataasiakkaat kaasarfiinit aallerniarnerup mamaattoorutaanera Vittus Qujaukitsup takusinnaavaa, inuiaqatigiilli peqqinnerulernissaannut siunertaqarnertik attappaa.

- Akitsuutit annernarput kisianni aamma suut akitsuusersorniarneqartut qanorlu taakkua annertutiginersut eqqarsaatigineqartariaqarput. Taamatut alloriartoqarnera peqqinnerulluta inuulernissatsinnut, pinaveersaartitsinermut inooriaasittalu allanngortinnissaanut eqqarsarnissamut periarfissiivoq.

AAMMA ATUARUK Akitsuutinut nutaanut akerliusut: Pissakinnerusut ilungersortut eqqugaaqqipput

  • Cigarettit 20-t 4 koruunit 40 øremillu akisunerulissapput.
  • Sukkut puussiaq kilomut 4 koruunit 31 øremik akisunerulissaaq.
  • Sukkulaatit, mamakujuit kiilumut 5 koruunimik akitsuuserneqassapput.
  • Imigassaq aamma akisunerulissaaq. Imigassallu puiaasaani literimut qanoq annertutiginersoq apeqqutaalluni akitsorneqassalluni. Immiaaraq 33 centiliteriusoq 66 øremik akisunerulissaaq.

Cigarrettinut, imigassamut sukkalaatinullu akitsuutit aningaasaqarnermut inatsimmi amigartooruteqarnermut matussusiissasut, Naalakkersuisut oqaatigaat.

Inuit pissakinnerusut akitsuusersuinikkut eqqugaassasut illuatungiliuttut isornartorsiutigaat. Tamanna Vittus Qujaukitsup isumaqatiginngilaa:

- Innuttaasut tamaavitta eqqorneqartussaavugut. Akissaatikitsut kisimik pineqanngillat kisianni inuiaqatigiittut tamavitta akitsuutinik qaffaaneq nammattussaavarput.

Ingerlatseqatigiiffiit akileraarnikinnerulernissaat suliffissanik pilersitsissasoq

Ingerlatseqatigiiffinnut akileraarutip procentinik tallimanik apparnissaa ukiuni tulliuttuni sisamani katillugu 162 millionit koruuninik naleqassaaq.

- Suliffeqarfiit pinngitsoorsinnaanngilagut taamaattumik suliffissaqartitsiniarneq akileraarutitigut isertitat, sinneqartoorutit ilaalu ilanngullugit pitsanngorsaaffigissagutsigit inuussutissarsiornikkut sinaakkutit nunanut unammillerfigisatsinnut sanillersuussinnaasariaqarput. Tassuunakkut aatsaat aningaasanik amerlanerusunik nunatsinni kaaviiartitaqalersinnaagatta.

Ingerlatseqatigiiffinnummi akileraarut nunanut allanut unammillerfiusunut sanilliullugu qaffasippallaartoq taanna isumaqarpoq.

- Nunarput siuariartulissappat taakkununnga sinaakkutissat tutsuiginartut pigisariaqarpagut. Tassanilu aatsitassarsiorneq, takornariaqarneq, aalisarneq sorparparujussuillu sinaakkummut iluaqusiisussaapput.

AAMMA ATUARUK Lige før nye afgifter: Brugseni har solgt 12 gange så meget sukker

Aningaasanulli inatsit ukiuni tulliuttuni sisamani oqimaaqatigiissappat akitsuusersuinernit 180 millionit koruunit aaneqartariaqarput.

Akitsuusersuisoqarneralu ingerlatseqatigiiffinnut akileraarummut matussusiiniarnerusoq Inuit Ataqatigiit Suleqatigiisitsisullu isornartorsiorpaat.

Tamaattoqanngitsorlu Vittus Qujaukitsoq isumaqarpoq.

- Suliniutit assigiinngitsorpassuit aningaasartuuteqarfigisussaavagut taamatut oqartoqaannarsinnaaanngilaq "una pissutigalugu" akitsuutit amerlisut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat