Vitaminit ingasaallugit toqussutaasinnaapput

“Vitaminit peqqinnartuupput”, oqaatsit taakku tusartuarpavut. Ingasaakkaannili peqqinnarunnaartartut nakorsat uppernarsaatissaqartippaat.
Allattoq Lotte Holm
januaarip 19-at 2009 07:51

Pineqarput meeqqat vitaminii iisartakkat seernarunnaarsarlugit jordbærimik appelsinamilluunniit mamarsaaserneqartartut.

Iisartakkallu puui qalipaatigissaartaqaat, pingaartumik multivitaminit, meeqqanut assut ussernartorsiortitsisarlutik.

Danmarkimi nakorsiartarfik Bisbebjergimiittoq, toqunartoqalersimanerit pillugit saaffiginnittarfeqartoq, nakorsat atuagassiaat aqqutigalugu maanna mianersoqqussuteqarpoq.

Saaffiginnissutit 1.000-ugaangata meeqqat vitaminitorpallaarsimasut pillugit saaffiginnitut 300-uusarput.

Vitaminit ingasaallugit allaat toqussutaasinnaasarput.

- Meeqqat tusartaannarpaat vitaminit peqqinnartut. Isumaqalertarpullu iisartakkat vitaminit qulit quleriaammik peqqinnarnerusut. Kisianni taamaanngilaq, nakorsaaneq Kim Dalhoff oqarpoq.

Meeqqat arfinillit missaannik ukiullit ussernartorsiornerusartuupput.

Vitaminitorpallaarsimasut aaverlugit aavisa akui misissortarpavut, vitaminillu ilaat qaffasippallaamik inissisimappata akiuussusiisarluta. Ajornerpaagaangat, soorlu aavat jerneqarpallaalersimappat, timip pisatai saassunneqarsinnaasarput, toqumik kinguneqarsinnaasumik.

Nakorsaanerup angajoqqaat kaammattorpai meeqqat inorsillugit vitaminit saqqumitinnagit sikaavinnut qullernut ilisassagaat.