Visumimik ajornannginnerusumik pisoqarsinnaalissaaq
Takornariat niunermillu suliaqartut ajornannginerusumik Danmarkimut isersinnaalernissaat Danmarkip suliniutigilerpaa.
Tamanna Kalaallit Nunaannut sunniuteqassasoq, nunanut allanut tunngassuteqartunut ministereqarfimmit nalunaarutigineqarpoq.
Niuertut nunat allamiut Danmark-imut isernissamut uppernarsaammik Visum-imik qinnuteqarunik ajornannginnerusumik pissarsiarisalissavaat, Nunanut allanut tunngasunik ministereqarfimmi innuttaasunut kiffartuussivimmi attaveqaqatigiinnermullu pisortaq visum-inillu qinnuteqartunik suliaqartartoq Ole Egberg Mikkelsen oqarpoq.
- Visum-inik piniartarnerit arlalitsigut pitsanngoriaateqassapput, taamaaliornikkut takornariat amerlanerusut tikittalernerannik kinguneqarumaartussaq, uani Danmark kisimi eqqarsaatigineqarani, naalagaaffeqatigiinnermulli tamarmut iluaqutaasussaalluni, Ole Egberg Mikkelsen oqarpoq.
Visum-inik piniarluni qinnuteqarnerup ajornannginnerulerneratigut, suliffeqarfiit nunanit allaneersut atorfilittai visum-inik qinnuteqarniarunik ajornannginerusumik pissarsiarisalissavaat.
Suliffeqarfiit nunanit allaneersut nunanut allanut tunngassuteqartunik ministereqarfimmit akuerisaareernikuusut, visum-inik qinnuteqaataat ullut pingasut ingerlanerini suliarineqarsinnaalissapput.
Takornariat umiartortullu visum-inik piniartarnerat ajornannginnerulersinneqassaaq, takornarianiillu aningaasat isertinneqartut amerlanerulerlutik, Ole Egberg oqarpoq.
Aningaasatigut ineriartorfiusunit takornariat, Kina-meersut Rusland-imeersut Ukraine-meersullu isumalluarfigineqarput.
Nunanit taakkunaninngaanneersut Kalaallit Nunaannut takornariartarnissaannut periarfissaqarluarpoq, taamaattumik visum-inik piniartarnerup ajornannginnerulersinneqarnissaa ajunngitsuuvoq, Ole Egberg oqarpoq.
Aasaanerani sulinngiffeqarneq qaangiuteriarpat visum-inik piniartarnermi periutsit nutaat atuutilissapput.
Nunat ataasiakkaarlugit akuersissutinik tunniussisalissaagut
Allannguutit ilai inatsisitigut allannguuteqartussaapput, folketinge-milu aalajangerneq apeqqutaasussaavoq, neriuppugullu tamanna ukiap ingerlanerani pisinnaajumaartoq, Ole Egberg suleqatitsinnit Martine Lind Krebs-imit apersorneqarluni oqarpoq.
Nedlæg
Jaaku Lyberth-ip nutsigaa Erna Lynge' atuarpaa.