Visit Greenlandip nittartakkani nutarsaraa
Taama iluatsitsineq nangeqqillugu nittartagaq nutarterlugu kusanarnerusunngortinneqassasoq, Visit Greenland ilisimatitsivoq.
Nittartakkamut alakkaasartut 2012-imi maajip aallartisimalerneranit ukiormanna maajimut marloriaatinngorsimasut, takornariartitseqatigiiffiup pisortaata Anders Stenbakkenip oqaatigaa.
Internetimili ineriartorneq sukkasoorujussuuvoq, ilaatigut oqarasuaatit angallattakkat smartphones-it qarasaasiaaqqallu tablets-it atugaaleraluttuinnarlutik, tamatuma kinguneranik ineriartortuarnissaq qulakkeerumallugu nutartertuarnissaq pisariaqartoq, Anders Stenbakken oqarpoq.
Ella Grødemip takornariartitseqatigiiffimmi suliniummi pisortaasup oqaatigaa, ullutsinni angalaniartut 3/4-ii qarasaasiat mobilillu atorlugit inniminniisartut.
Nittartagaq atoruminarnerusoq
- Taamaattumik takujuminartumik nittartagaqarnissarput pingaaruteqarluinnarpoq, matumani apeqqutasussaanngimmat nittartagaq oqarasuaammit angallattakkamit, iPadimit qarasaasiamilluunniit nalinginnaasumit takuniarneqarnersoq, Ella Grødem nassuiaavoq.
Nittartagaq maanna pisariunnginnerusumik isikkoqalerpoq, naatsunik atuagassartaqarluni, taakkunani ornitassaq imaluunniit sammititassaq sooq takuniartariaqarnersoq oqaluttuarineqarluni, takornariallu takuniaareersimasut oqaasiinik issuaaffgiineqarnerat atorneqartarluni.
- Taama attaveqatigeeriaaseq takornarianut isumassarsinarneruvoq, uppernarnerulluni sunniuteqarnerullunilu, Ella Grødem isumaqarpoq.
Allannguutit nammineerluni takorusukkaanni nittartagaq www.greenland.com iserfigalugu Visit Greenlandip Nunarput takornariarfissatut qanoq nittarsaanneraa takuneqarsinnaavoq.
