Assi: Visit Greenland

Visit Greenland Takornariaqarnermut Siunnersuisoqatigiinni pitsaanerpaanut akuusoq

Flight Networkip, nunarsuarmi nittartakkatsigut angalatitseqatigiiffiit annersaasa ilaat, Canadamiunit pigineqartup, Visit Greenland 2017-mi Nunarsuarmi Takornariaqarnermut Siunnersuisoqatigiinni pitsaanerpaat 20-t ilaattut toqqarpaa.

Visit Greenland Takornariaqarnermut Siunnersuisoqatigiinni pitsaanerpaani 20-usuni normu 16-mi inissippoq. Tassani NYCGO New Yorkimiittoq aamma Keep Exploring Canada siuttuupput.

Allaaserisat, assit filmiliaaqqallu atorlugit Nunatta takornarianut tunniussinnaasai Visit Greenlandip nittartakkamini oqaluttuarisarpai. 

Tamannalu Flight Networkimit nersualaarneqarpoq.

- Kalaallit Nunaat takornariarfigissallugu ajornakusoortuuvoq, taamaattorli Visit Greenlandip iluatsittumik tikeraarfissat assigiinngissusaat takutilluarpaa, isimut takujuminartunik nittarsaassinermik tunngaveqartumik aammalu  paasiuminartumik pilerinartumillu misigisassat attaveqaatitigut siammarternerisigut - angalasunut assigiinngiiaaqisunut saaffiginnittumik suliaqarsimasoq, Flight Network Visit Greenlandimik toqqaanermini ilaatigut taamak tunngavilersuuteqarpoq. 

- Visit Greenland nersortarialimmik paasissutissiisarpoq, nutaaliortumik soqutiginartumillu. Eqqumiikajaalaartunik oqaluttualiorneq aallunneqarpoq, soorlu qanoq eqqortumik atikkersornissamiit inngernermut, aammalu qanoq Kalaallit Nunaannut tikinneqarsinnaaneranut tungasuullutik. Taakkua tamarmik katiterneqartarput aalasulianngorlugit, assinngorlugit, titartaganngorlugit aammalu atuagassianngorlugit nittartakkakkut eqqarsaatigilluakkamik suliaallutik.

Taamatut nersorneqarneq Visit Greenlandip pisortaata Anders Stenbakkenip tulluusimaarutigaa. 

- Takornariaqarnermut siunnersoqatigiittut ataqqineqaatigeqaarput siunnersoqatigiit allat angisuut ingerlalluartullu, soorlu New York aamma Canada akornanni inississinnaagatta, Stenbakken oqarpoq. 

Tamanna ukuini arfineq marlunni Visit Greenlandimi allaffitsinni nunatsinnilu sulisut atorlugit ulapputigalugu sulissutigiuarparput.Taassuma saniatigut takornariaqarnikkut periusissaq pilersissimavarput attassimallugulu, tamannalu ersarissumik suleriuseqartissimavaatigut Nunarput issittumiittoq tikeraarfissatut avammut nittarsaanneranut, Stenbakken oqarpoq. 

Nunarsuarmi Takornariaqarnermut Siunnersuisoqatigiinni pitsaanerpaat 20-usuni allattorsimaffik uani takuneqarsinnaavoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat