Visit Greenland Ilulissanut nuulli
-Qitiusumik takornariartitsinikkut sullissivik takornariaqarfimmiittariaqarpoq, Ane Lone Bagger oqarpoq, nunatsinnilu takornariqarnikkut sullissiviup Visit Greenlandip Nuummit Ilulissanut nuunneqartariaqarsoralugu.
Nunatsinnut takornariartartut amerlanersaat Ilulissanukartarput, ilaatigut Kangiata kangerlua, UNESCO naapertorlugu nunarsuarmi eriagisassatut immikkoortitat 911-iusunit pingaarnerit qulitr akornanniittoq ornillugu, tamannalu nunatsinni takornariartitsinikkut ineriartortitsinermi atorluarneqartariaqarpoq, aamma Demokraatinit isumaqarput takornariaqartitsinikkut sullissivik takornariaqarfimmiittariaqartoq, ane Lone Bagger Demokraatineersoq Qaasuitsup Kommunianilu kommunimut qinigassanngortittoq oqarpoq. Nunatsinni takornariartitsinikkut inerisaaviup Visit Greenlandip Nuummit Ilulissanut nuuneqarnissaa kissaatigaa.
-Suliani suniluunniit pitsaasumik angusaqarniassagaanni atuisut qaninnerusariaqarput, Ane Lone Bagger oqarpoq, tassungalu atatillugu takornariaqarnermut aalisarnermullu tunngatillugu aamma kissaatigaa Ilulissani umiarsualivik mittarfillu allilerneqassasut kissaatigalugu.
Visit Greenlandilli pisortaata Anders Stenbakkenip nassuiaataa malillugu Visit Greenland takornarianik toqqaannartumik suliaqartuunngilaq, taamaattumillu Ilulissanut nuunneqarnissaa pisariaqarsorinagu, nammineq toqqaannartumik takornarianik sullissisuunnginnamik.
- Nunatsinni nunattalu avataani agentit takornariartitsisartullu suleqatigalugit Kalaallit Nunaata nittarsaanneqarnissaa suliassaraarput, Anders Stenbakken Visit Greenlandimeersoq ullumikkullu Nuummi Københavnimilu allaffeqartumeersoq oqarpoq.
-Nuummi allaffeqarfimmut tunngatillugu naalakkersuisoqarfiit, ataatsimiititaliat, naalakkersuisut allallu ullut tamaasa ataatsimeeqatigisarpaugt. Tassalu suliarinerusartakkavut taakkuupput. Danmarkimilu allaffeqarfinitsinnut tunngatillugu, nunarsuarmi saqqummersitsinernut peqataasarpugut aammalu umiarsuit takornariartaatit aamma suliniuteqarfigisarlutigit, taamaammat nunatta aallartitaqarfiani allaffeqarnissarput pitsaasuuvoq, Anders Stenbakken oqarpoq. Kisianni Nunatta internettikkut nittarsaannissaanut tunngatillugu sumi inissisimaneq apeqqutaanngilaq.
-Nittarsaassinermik suliaqarnermut, internettikkoornerusumut, tunngatillugu, Paamiuniissinnaagaluarpugut, sumimi inissisimanissarput apeqqutaavallaanngilaq, pisortaq Anders Stenbakken oqarpoq. Pisortalli suliffeqarfiutaata Visit Greenlandip sumiinnissaa politikkikkut aalajangigassaavoq.
