Visit Greenland Afrikami
Nunatsinni Takornariaqarnermi Siunnersuisoqatigiit - Visit Greenland, Sermersooq Business Council, Destination East Greenland aamma Tasermiut Expeditions ataatsimeersuarnermi peqataatitaqarput - takornariartitsinermik suliaqartut allat nunarsuarmit tamaneersut 700-t peqatigalugit suleqatigiissutigineqarsinnaasut isumassarsianillu inerisaaneq pillugit eqqartueqatigaat.
Anders la Cour Vahl Visit Greenlandimeersoq naapertorlugu, misigisassarsiortitsilluni takornariartitsinermi neqeroorutigineqartartut tassaaginnanngillat pissanganartorsiorunalluni takornariarnerit, soorlu basejumping, qaqqasiorneq kuussuarnilu sarfartuuni qajartornerit.
- Misigisassarsiortitsilluni takornariartitsinermi sorpassuit pineqarput. Pinngortitami misigisassat, kulturimik misigisassat imminullu unammillernerit akuleriissinneqartarput, Nunatsinnilu misigisassatut takornarianut neqeroorutigineqartartut tamangajammik misigisassarsiortitsilluni takornariartitsinertut taaneqarsinnaasut oqaatigaa.
Anders la Cour Vahlip aamma erseqqissaatigaa Misigisassarsiortitsilluni takornariartitsineq takornariartitsinerup iluani siuariatorfiunerpaasoq, misissuinerillu nutaat takutikkaat ukiumut 263 mia. koruuninik kaaviiaartitsiffiusartoq.
Visit Greenland Afrikami Kujallermi ataatsimeersuaqataanermini takornariartitsisarfissuit isumalluarnartut tallimat attaveqafigilerpai, taakkununngalu attaveqalersimanernik malitseqartissamaarpaat. Peqatigitillugu aamma takornariartitsisartut Nunatsinnut angalatitsisartut naapisimaarneqarput, Nunatsinnilu misigisassarsiortitsilluni angalanerit amerlisarneqarnissaannut periarfissat pillugit oqaloqatigineqarlutik.
