Inuit arlallit suli kinaassusersineqanngitsut VISA-Dankortilinnut allakkasuaatitigut ulluni makkunani paasissutissanik uukapaatitsiniarsareqattaarput.
Allagarsisimasut arlallit qanoriliussanerlutik apeqqutigalugu Grønlandsbankimut saaffiginnittarsimapput. Allagarsisut nittartakkamut aalajangersimasumut paasissutissanik immersueqqeqqusaasarsimapput, atortorissaarutinik nutarterinermi paasissutissanik tammartoqarsimaneraallutik.
- VISA-mit taarsigassarsiniartarfinniillu sullitat toqqaannartumik saaffigineqarnavianngillat – taakku tamatigut aningaaserivik aqqusaaqqaarlugu sullitanut saaffiginnittarput, taamaattumik allakkasuaatitigut nittartakkat innersuunneqartut ammarneqarnissaat mianersoqqussutigaarput, Grønlandsbankimi aaqqiissuusaanermut immikkoortortami sulisoq, Per Skaaning oqarpoq.
Danmarkimi bagmandspolitiit, Europamilu nunani arlalinni politiit, nassiussuisunik ujaasinertik aallartereerpaat.