Virginiami aallaasersortoq kinaassusersivaat

USA-p oqaluttuarisaanerani pisoq amiilaarnarnerpaaq ippassaq pivoq, tassa atuarfiit ilaanni aallaasersortoqarmat inuit 32-t inuunerannik akeqartumik, inuit 15-it aallaasersornermi aamma ikiligaapput. Angutilli silaarulluni aallaasersortup aqqa politiit suli isertuuppaat, naak Virginiami politiit angut kinaassusersereeraluaraat, nutaarsiassaqartitsivik Sky News taama ilisimatitsivoq.

Aviisili Chicago Sun Times naapertorlugu, oqartussaasut isumaqarput, angut aallaasersortoq tassaasoq, kinamiu 24-nik ukiulik, ilinniarnertuunngorniarnissaminut visummimik pissarsinermi kingorna San Franciscomut siorna aggustip ulluisa arfineq-aappaanni tikittoq.

Angut aallaasersortoq takunnittut asiamiunit kingoqqisuussangatinnerarpaat. Illuinnarsuummik aallaammillu aallartiinnarissamik angut aallaarsarivoq – aallaasillu taakku normui tamarmik piiarneqarsimapput. Angut ”toqutsisutut nipaarluttut” aviisimit Washington Postimit allaaserineqarpoq, toqoraagami toqutaminut misigissutsinik sumilluuniit takutitsinngitsoq.

Pinerluttup toqunniakkani sanileriiaartissimavai, misigittaaqalunilu tulleriiaarlugit aallaarsaralugit, amerikamiut nutaarsiassaqartitsiviisa arlallit tamanna allaaseraat.

Politiit inimut atuarfiusumut tassunga, aallaasersornerup annertunersaasa ingerlanneqarfianut, isaalermata, angutip aallaanni imminut toraarpaa, imminullu toqulluni. Angut sooq aallaasersornersoq suli ilisimaneqanngilaq.