Vindruuanit vodkaliortarusupput
Naatsiianik karrinillu manna tikillugu vodkaliortoqartarpoq. Naasorissaasut naatsiiassanik karrissanillu amigaateqartualeramik, vindruuat atorlugit vodkaliornissaminnut akuersissut EU-mut manna noqqaassutigaat.
Danmarkimi immussualiaasartup Fetap EU-mi oqallisigineqarneratu oqallittoqarpoq. Taamani grækerit naammagittaalliorput tamatuma kingorna eqqartuussivilersuussisoqarpoq. Immussuarlu Kangiani Qiterlermi tuniniarneqassaguni allarluinarmik taaguuserneqartariaqarpoq.
EU-mi nunani assigiinngitsuni naasorissaasut vodkaliornissartik anguniarlugu akuersissummik tunineqarusupput. Cognac, whisky aamma rom EU-mi immiortarnissaannut malittarisassat 1989-imiilli atuuttut malillugit immialiarineqartarput.
Juullinngitsiartoq EU-mi kommissioni nutaamik immiornissamut malittarisassanik nutarteriniarluni nalunaaruteqarniariartoq, nunanit vodkaliorfiusartunit nalunaarutigineqarpoq, vodka naatsiianit karrissanillu immiarineqartilluni pitsaanerpaasartoq.
Taamatut nalunaaruteqarnermi Polen siuttuuvoq Polenimi naasorissaasut vodkaarniartarnertik iluanaarutigilluartarpaat. Nunat allamiut tapersersuinissaat anguniarneqarportaaq.
EU-mi naasorissaasut vinniliaassat aalakkoornartortaat atorlugu vodkaliorniartalernissaat nunani vodkaliorfiusartuni annilaagatigineqarpoq.
Frankrigimi nunanilu viinniliorfiusartuni viinnissat sinneqartoorutaapput viinnillu naleqarpiarunnaarput. Taamaattumik nunani viinniliorfiusartuni soqutigineqarpoq kimitsunerusunik mamaqannginnerusunillu immiortarnissaq, soorlu vodkamik.
Sverigemi vodkaliorfiup Danmarkimi immikkoortortaqarfeqalernerata kingunerisaanik Danmarki naatsiiat karrillu isserannik vodkaliorfinnut ilanngunnikuuvoq. Absolut Danmarkimi vodkaliarineqartarpoq Sverigelu aqqutigalugu avammut tunineqartarluni.
