Villy takulluarfigaat
Naalakkersuisut siulittaasuata nunanullu allanut tunngasunut ministerip Nunatta Danmarkillu akornanni suleqatigiinneq oqaloqatigilluarsimavaat, soorlu aamma nunanut allanut tunngasunut, aatsitassat, Issittumilu ineriartupiloorneq sammisigimagaat.
Nunatsinni aatsitassarsiorniarnermi Danmarkimi suliffeqarfiit aningaasateqarfiillu soqutiginninnerannik Danmarkimi tusagassiuutit piffissami kingullermi allaaserisaqaqattaarnerat aamma sammineqarpoq.
Danmarkimi suliffeqarfiit Kalaallit Nunaanni aatsitassarsiornermi ineriartortitsinissamut peqataaniarpata qanoq iliuuseqartoqarnissaanut Kalaallit Nunaata siulliusariaqarnera, statsministeri Helle Thorning-Schmidtip qanittukkut oqaatigaa, Villy Søvndalillu tamanna taperserpaa.
Kuupik V. Kleistip tusaatissatut tamanna tiguaa, tamakkununnga Issittumilu allanut tunngasunik misissuisoqarsinnaanera aammalu alloriaqqinnissamut Naalakkersuisut iliuuseqarsinnaanerat ammatikkumallugu.
Kuupik V. Kleistilli erseqqissarpaa danskiuneq peqqutiginnarlugu salliutitsisoqassanngitsoq:
- Aningaasaleerusussinnaasut nunanit allanit soqutiginnissinnaasunut unammilleqateqarsinnaasariaqarput. Danskilli aningaasaleerusussinnaasut Kalaallit Nunaanni periarfissagissaartorujussuupput nunatta akornini oqaluttuarisaanitsigut ataqatigiinnerput peqqutigalugu aamma immitsinnut ilisarisimaqatigiilluaratta, Naalakkersuisut siulittaasuat Kuupik V. Kleist oqarpoq.