Villy Søvndal: Uran sillimaniarnermut politikkiuvoq

Danmarkimi nunanut allanut tunngasunut ministeri, Villy Søvndal, Nuummi ullut marluk tikeraareerluni, taama isumaqarpoq. Naalakkersuisut siulittaasuat, Aleqa Hammond, Nuummiinnermini ilaatigut ataatsimeeqatigaa.

Taama oqarnermini tikkuagaa tassaavoq Eqqartuussissuserisoqarfiup, Lettip, nalunaarusiaa. Nalunaarummi inerniliunneqartoq tassaavoq, Kalaallit Nunaat ajunngitsumik siunertaqarluni, Danmarkimi naalakkersuisut akuliutitinngikkaluarlugit, uranimik avammut tunisassiorsinnaasoq.

- Illuatungeriit oqallisaasumut isummaminnik annissinerat pissusissamisoorpoq. Lett-imiillu nalunaarusiaq kalaallit isumaannik saqqummiussisoq paasivarput. Nunanut allanut ministereqarfik apeqqut pillugu maanna naliliissaaq, Villy Søvndal aviisimut Politikenimut ullumi saqqummersumut oqarpoq.

- Apeqqummut attuumassuteqartorpassuupput. Soorlu uranip isumannaatsumik qanoq suliarineqarnissaanut tunngasut. Uranisiornerup avatangiisinut, pinngortitamut inunnullumi kingunerisinnaasai aamma eqqarsaatigineqartariaqarput. Uranip qanoq pinissaa eqqarsaatigalugu nakkutiginnilluartoqarnissaa pingaruteqarpoq, Villy Søvdal aviisimut oqarpoq.

- Uranip aatsitassallu qinngulanertallit allat avammut nioqqutigineqarnissaat nunanit allanit aalangiunneqassappat, naalagaaffiup illersornissamut- isumannaatsuunissaanullu politikkiat kalluarneqanngitsoornavianngilaq, Villy Søvndal Politikenimut aamma oqarpoq.

- Kalaallit uranimik atuinissaanni avammullu tunisassiornissaanni sillimaniarnerup illersornissallu tungaatigut arlaatigut kingunissaqarpoq, Aleqa Hammond tusagassiuutinut ippassaq nalunaarummini allappoq.