Villy Kinamiunut: Kalaallit ilinniarfiginiarsigik
Kinami nunanut allanut tunngassuteqartunut ministeri, Yang Jiechi, Beijingimi ippassaq ataatsimeeqatigereerlugu, Villy Søvndal tibetimiunut isumaalunnerarpoq. Aviisimi Politikenimi tamanna allaaserineqarpoq.
- Imminnut ikuallallutik imminnut toquttorpassuit pissutigalugit Tiberimi pissutsit ernummatigeqaavut. Neriuutissaarutivinnermut tamanna takussutissaavoq, tusagassiortunik ippassaq unnukkut katersortitsinermi Villy Søvndal oqarpoq.
Inuit kinaassusaat imminnullu tatiginerat tammatsaalineqassappat, Namminersorlutik Oqartussat assersuutissaqqissutut taavai.
Kinamiut Issittumi Siunnersuisoqatigiinni aalajangeeqataasinnaassanngikkaluarlutik ataatsimeeqataasinnaasarnissaminnik kissaataat Danmarkimit Kalaallit Nunaannillu tapersersorneqartoq, Villy Søvndalip ministereqatiminut iluatigalugu aamma uppernarsarpaa. Tusagassiortunilli katersortitsinermi erseqqissaatigaa, Isukasiani saviminissarsiornissaq ataatsimiinnermi ullormut oqaluuserisassanut ilaanngitsoq.
- Inatsit malillugu Kalaallit Nunaanni aalajangiisoqartussaavoq. Akuliunnissarput eqqarsaatigisariaqanngilarpulluunniit, Politikenimi allaaserineqartut naapertorlugit, Villy Søvndal oqarpoq.