Villy: Irakimi sorsoqataanerup misissorneqarnissaa pingaarneruvoq
- Danmarkip Iraqimut sorsoqataasimaneranut aalajangernerup, isumaga malillugu kukkunerujussuusup, misissornissaa uannut pingaaruteqarneruvoq, tamannalu siulliuttariaqarparput. Tassami Naalakkersuisoqatigiinnik pilersitsinermi suna tamaat piviusunngortissinnaanngilarput,Villy Søvndal KNR-imut oqarpoq.
Taassuma uppernarsarusunngilaa Naalakkersuisuutitaqalersut partiit ilaasa ataatsip CIA-mik misissuisitsisoqarnissaanik isumaqataasimannginnera.
- Naalakkersuisuutitaqalersut partiit pingasut tamarmiulluta tamanna siunniupparput. Pingaarnersiuinitsinnilu Iraqimut sorsunnermi Danmarki inuit pisinnaatitaaffiinik unioqqutitsisimanersoq misissussallugu aalajangersimavugut.
Villy Søvndal Danmarkip Radioanit ippassaq aperineqarami, sooq CIA pillugu misissuinissaq unitsinneqarnersoq, akivoq kingumoortumik misissuinissaq aammalu tamassuma akisunerujussua pissutigalugu misissuisoqassannginneranik aalajangersimallutik. Taassumalu misissuinissap qanoq akisutiginera oqaatigissinnaannginnerarpaa.
- Misissuinnginnissap qanoq akisutiginera tunngavigineqanngilaq. Misissuisoqarnissaa isumaqataaffigigaluarpara, pingaarnersiuisariaqarpugulli. Taamaattumik Iraqimut sorsoqataasimanerup misissorneqarnissaa siulliuttariaqarmat taama naliliivugut,Villy Søvndal oqarpoq.
- Nunatsinni Inatsisartut Naalakkersuisullu piumasarisimavaat CIA-p timmisartuussisarsimaneragaanera misissorneqartariaqartoq. Qallunaat Naalakkersuisuisa misissuinnginnissaat isumaqanngilaq Kalaallit Nunaata kissaataasa akuerinngikkipput, Villy Søvndal oqarpoq.
- Uagutsinnut pingaaruteqartuuvoq danskit atorfilittaasa ilisimasaat aammalu allagaataat Kalaallit Nunaanni oqartussat atorfilittaasa takusinnaassagaat, tamannalu tassa periarfissaavoq, Villy Søvndal oqarpoq.
Nunanut allanut ministerip misissuisoqannginnissaanik nalunaaruteqanngilaattaani Doris Jakobsenip Villy Søvndal apeqquteqarfigigaluarpaa, misissuinissap qanoq akeqarnera paaserusullugu.
