Ville Siegstad Avannaata Qimussersuanngorpoq

Nunatsinni unamminerit avannaani pissangassutaanerpaartaasa ilaat Avannaata Qimussersua naammasseqqammerpoq. Ilulissani qimussinik sukkaniunneq qimussersunit 40-nit peqataaffigineqartoq ullaap tungaa aallartittoq ullumi ingerlanneqarpoq. Nalunaaqutarlu marluk missaani siulliit apuupput.
Allattoq Najaaraq Egede
marsip 28-at 2009 13:30

40 kilometerisut isorartutigisumut sukkaniunnermi ajugaasuuvoq 63-inik ukiulik siornatigut 1996-imi 2004-milu Avannaata Qimussersuanngortareersoq Ville Siegstad, Ilulissaneersoq. Tulliuvoq Saqqameersoq William Jensen. Taakku apuukkiartornerat pissangatitsilaavippoq sanileriikannerlutimmi kilometerit kingulliit tamavissallutik sukkaniuffigigamikku.

Ilulissaneersoq alla Jørgen Kristensen pingajuulluni apuuppoq.

Normu 4-raavoq Otto Kristensen, Innarsunnit Upernaviup eqqaaneersoq. Normu 5-ulluni Jens Ole Jensen, Uummannameersoq siorna Avannaata qimussersuanngortoq.

Avannaata Qimussersua Ville Siegstad unnugu akissarsitinneqassaaq, aningaasanik 20.000 koruuninnassalluni unammersuarnermilu aningaasaleeqataasup Royal Caninip qimminut nerukkaatissaliaasa pitsaanersaannik poorsuarnik 30-nik pinnassalluni.

Katerisimaarnermi arfinernut allartittumi aamma qimmerinnerpaaq toqqarneqassaaq.