Vilhelm Lyngep erinarsoqatigiivi Tall Ship Racingimut peqataalersut
Kingumut Vilhelm Lyngep erinarsoqatigiivi Qaqortumeersut Århusimi umiarsuarsuit nunani assigiinngitsuni 17-eersut naapilerpata aliikkusersuillutik peqataaqqilerput.
Allattoq Simon Uldum -
maajip 28-at 2013 13:51
2007-mi Århusimiimmata peqataapput, maanna angutit erinarsoqatigiit Saqqaarsik peqatigalugit erinarsornermik, qilaatersornermik, kalattoornermik, qaannamik takutitsinermik minnerunngitsumillu umiamik takutitsinermik aliikkusersuissallutik peqataalerput.
- Tall Ship Racing umiarsuarsuit peqataasussat 104-sut nalunaarsimapput, taakkunanilu 3000-it missaaniittut inuttaasut nunani assigiingitsuneersuupput. Juli-p 4-aniit 7-ata tungaannut aliikkusersuineq ingerlanneqassaaq. Julip 7-ani umiarsuarsuit aallakaassapput, Vilhelm Lyngep erinarsoqatigiivini siulittaasoq, Sika Frederiksen KNR.gl-imut oqarpoq.
Angalaneq piviusunngorpoq NAPA-p, Lions Club Qaqortup, Kommune Kujalliullu aningaasaliinerasigut. Taakku qujaffigerujussuarpavut.
