Vikingit ingerlaarfigisimasaat qulaajarneqarput
Kalaallit Nunaat allaaserineqaraangat eqqartorneqaraangalluunniit sila kialaartoq pinngortitarlu qorsuk eqqartorneqartut nalinginnaanngilaq. Silalli kiannera pissutigerpiarlugu vikingit ukioq 900-p missaani Kalaallit Nunaanni nunassissimapput, silalu nillertinnerummat allamut nuussimallutik. Aviisimi Berlingske Tidendemi allaaserisat naapertorlugit misissuinermi nutaami tamanna erserpoq.
Ilisimatuut University of Saskatchewanimeersut uillut qaleruaannik misissuillutik vikingit nalaanni, ukiullu akulliit nalaanni, Atlantikup Avannaani silap kiassusaata qanoq allanngorarsimatiginera takusinnaanngorsimavaat.
Silap pissusaata allanngorarsimanerujussua nikerarnerujussuusimaneralu misissuinerit ersersippaat.
Jette Arneborgip, Katersugaasivissuarmeersup oqarnera naapertorlugu silap pissusaata allanngorarnera qallunaatsiaat Kalaallit Nunaanniit peerunnerannut pissutaavoq.
- Issinnerulermat qallunaatsiaat assigiinngitsunik naatitsisinnaajunnaarput. Qallunaatsiaat naasorissaasuupput, saarngisali misissorneranni paasinarsivoq naatitsisinnaarpiarunnaaramik puisit neqaat annassutigisimagaat, Jette Arneborg aviisimut Berlingske Tidendemut nassuiaavoq.
Qallunaatsiaat Kalaallit Nunaat vikingitut 900-kkunni tikeriarlugu, 1400-kkunni qimappaat.
