Vietnamimi virusimut aarlerineq pissutigalugu illoqarfimmit aneqqusaajunnaartoqartoq

Vietnamip nunap immikkoortuata ilarujussua 10.000-t missaannik innuttaasoqartoq coronavirusip tuniluunnissaata aarlerigineqarnera pissutigalugu aneqqusaajunnaarfiuvoq.

Tusagassiorfik AFP taama allaaserisaqarpoq.

- Februaarip ulluisa 13-iat aallarnerfigalugu nunap immikkoortua, Son Loi tuniluuffiusoq erngertumik aneqqusaajunnaarfiginiarparput, vietnamimiut peqqinnissamut ministereqarfiat, allattoq AFP allappoq.

- Aneqqusaajunnaartoqarnera (...) ulluni 20-ni atuutissaaq, ministereqarfik nangilluni allappoq.

AFP allaaserisaa naapertorlugu tamanna Kinamiut illoqarfiannit, Wuhanimit virusip tuniluutilernerata kingornatigut Kinap avataani amerlasoorujussuarnik aneqqusaajunnaartoqarnerani siulliuvoq.

AAMMA ATUARUK WHO-p coronavirusimut akiuussutaasinnaasut misiliutiginiarai

Son Loi-imi qassiiusunik nunaateqarfeqarpoq. Taannalu illoqarfiit pingaarnersaannit Honai-imit 40 kilometerinik ungasitsigisumiilluni.

Vietnamimi inuit 15-it virusimik tunillatsissimasut uppernarsarneqarnikuuvoq.

Tunillatsissimasunit arfinillit Son Loi-imeersuupput.

Vietnamimilu timmisartuutileqatigiiffiit annerpaartaata, Vietnam Airlinesip sapaatip-akunneranut 10,8 millionit dollarit tassa danskit koruuninngorlugu 75 millionit koruunit missaat virusip tuniluunnerani angallannermi killilersuinerit pissutigalugit kaaviiaartitaminik annaasaqaatigalugit sisamanngornermi nalunaarutigaa.

Reuters taama allaaserisaqarpoq.

AAMMA ATUARUK SAS Kinamut timmisartuussisarnerminik taamaatitsigallartoq

Timmisartuutileqatigiiffiup aningaasartuutini virusip kaaviiaartitanut sunniuteqarnerlunnera pissutigalugu annikillisinniarsarileruttorpai.

Vietnam Airlinesip Kinamit Kinamullu timmisartuussinerit januaarip naaneraniilli unitsippai.

Tamanna nunat taakku marluk akornanni qaammammut angalasunut 70.000-t missaanniittunut toqqaannartumik sunniuteqartoq, timmisartuutileqatigiiffik nalunaaruteqartoq Reuters allappoq.

/ritzau/