VIDEO Sulisoq aalajaatsoq dronningip saqqarmiuliuttagaanik tunineqartoq
Isak Cortzen ukiuni 50-ini aalajaatsumik sulereerluni dronning Margrethep saqqarmiuliuttagaanik silviusumik Ilulissani ippassaq saqqarmiulerneqarpoq.
Isak Cortzen ukiuni taama amerlatigisuni sulereerluni soraarninngornissaminut piareersimassasorinaraluarpoq, taamaattoqanngilarli.
- Naamerluinnaq, uanga uninngaannarnissara takorloorsinnaanngilara.
- Sunaluunniit suliffik suliffiginiaraanni, aalajaaffigalugu suliffigisariaqarpoq. Tassa, taanna uanga timitaliussimagunarpara. Aalajaaffigivara suliffik, ornittuarpara, KNR-imut oqarpoq.
Ullormut nal. ak. 12-t
Isak Cortzen ukiut 50-it matuma siorna KGH-mi sulilermat, sulinermi atugassarititaasut allaanerungaatsiarput.
- Sulineq ullaakkut arfinermut aallartittarpoq ualikkullu arfinermut naammassisarluni. Tassa, taamanikkut KGH-p iluani 12 timet suleriuseqarpugut.
- Maannakkut atortorissaarutinik ulikkaarpugut, assagulluunniit atorusunngikkutsigit atortariaqanngikkaluarpagut maannakkut. Tassa taamaallaat qamutinut ingikkutta, taama oqaluttuarpoq qamutinullu gaffeltruckinut ikilluni.
Inuusuttunut oqariartuutissaqarpoq
Isak Cortzen ukiorpassuarni sulereerluni inuusuttunut maanna ilinniartunut pitsassuarnik siunnersuutissaqarpoq.
- Suliffimmut tunniusimaneq, taavalu ullaakkut itersinnaaneq, suliassallu assigiinngitsut malinnaaffigalugit suleqataaneq. Tassa sulinerup nuannersua taamaalillugu inuusuttunut tunniussinnaavara.