VIDEO Saarulliit akitsuusersorneqarnissaannut akerliuvoq

Aalisarnermut Naalakkersuisoq Finn Karlsen aalisakkanik tamanik 2016-imit akitsuusersuisalernissamik Naalakkersuisut Aningaasanut Inatsisissatut Siunnersuutaannut tunngatillugu maanna oqarpoq, saarulliit akitsuusersorneqartalernissaannut isumamut akerliulluni.
Allattoq Thora H. Nielsen
aggustip 27-at 2014 07:20

- Saarulliit sisamariaammik akitsuusersorneqarsinnaassappata immaqa periarfissaqarsinnaassaaq, ullumikkutulli akeqartillugit marloriaammilluunnit akeqaleraluarpata akitsuusersornissai akilersinnaanngillat, Finn Karlsen nassuiaavoq.

Naalakkersuisut Aningaasanut Inatsisissatut Siunnersuutaanni atuarneqarsinnaavoq aalisakkat suulluunnit qaqinneqartut aalajangersimasumik annertussuseqaleraangata 2016-imit akitsuusersorneqartalernissaannut siunniussaqartut. Taamaaliornikkut 2016-imi 15 million koruunit isertinniarneqarput 2017-imilu 50 million koruunit isertinniarneqarlutik.

Saarullinnulli tunngatillugu akitsuusersuisalernissaq Finn Karlsenip tapersersunngilaa, maannangaarlu neriorsuisinnaanersoq aperineqarami ima oqarpoq:

- Aap, taama erseqqitsigisumik akissavakkit.

Aalisarnerup tungaatigut allanngortiterinissami isumassarsiorfiusinnaasumik suleqatigiissitamik pilersitsinissaq Finn Karlsenip aallaqqaammut ilisimasaqarfigerpiarnagu oqaatigisimagaluarpaa, naak Aningaasanut Inatsisissatut Siunnersuummi allaaserineqarsimagaluartoq. Tamatumali ilisimannginneranut peqqutaatinnerarpaa nammineq naalakkersuisunngunngikkallarami suleqatigiissitamik pilersitsinissamik oqaloqatigiissuteqartoqarsimanera.

- Suleqatigiissitaq pilersinneqarsimasoq ukiup tullissaani sulilluni aallartinniarsimanissaa qularnanngilaq, suleqatigiissitallu suut akitsuusersorneqassanersut pillugit eqqarsaatersuutini ukiunut 2015-imut, 2016-imut aamma 2017-imut isummerfigisassatut saqqummiutissajunnarsivai, taamanikkussamullu suut akuerineqarsinnaassanersut suullu akuerineqarsinnaannginnersut taamanikkussamut nalilersussavarput.